Shillong Nailar 20: Da kaba pynpaw ia ka jingsngewkhia ia kaei kaba la mih na ka rally thuk thuk ka KSU, u Symbud Myntri Rangbah ka Jylla Bah Sniawbhalang Dhar ha ka sngi Palei, ula kyntu ban pynneh ia ka jingsuk bad ba ka sorkar ka long kaba kloi na ka bynta ban iakren.
“Kane ka jingjia ka long kaei kaei kaba sngewsih bad ka bym lah ban pdiang da ka Sorkar Jylla. Nga kyrpad ia ka KSU bad ia baroh ki kynhun bad ki paitbah ka jylla ban pynneh ia ka jingsuk. Lada don ia kino kino ki mat, ka jingkhang jong ka Sorkar kadei kaba plie beit na ka bynta ban iakren” ong u Bah Dhar.
Ula ong, ba ka sorkar kala shimkhia ia ki mat jingdawa jong ka KSU bad shen kan sa iakynduh noh bad ki.
“Ngi lah iohi ia ki jingdawa ki jongki. Ai ba kin wan shwa ban iakren, ngi lah long kiba kloi. U Myntri Rangbah ka Jylla bad u Bah Wailadmiki Shylla hynin ka sngi ki lah dep ban kren da kaba shai kdar ba ki long kiba kloi ban pdiang ia ki na ka bynta ban iakren. To ngin sa ia peit ha kine ki shi sngi ne ar sngi” ula ong.
Haba kylli la ka sorkar kan khot iakren ia ka KSU, ula ong ba ia kane ka mat, yn sa rai shisien ba u Myntri Rangbah ula wanphai.
“U Myntri Rnagbah um don hapoh ka jylla. Ai ba un wan shwa, ngi ngin sa shimkhia ia kane ha ka rukom kaba dei. Kam don kano kano ka jingkylli jong ka jingpynslem ban khot iakren noh ia ki” ong u Bah Dhar.
Ula maham ba kano kano ka jingleh kan pynmih beit ia ka jingpynphai kylla bad ula kyntu ia ki samla pule ba kin burom ia ka aiñ.
Ha kaba iadei bad ka jinglong jingman kaba la jia ha Assam, u Bah Dhar ula ong ba baroh ar ki Sorkar Jylla kila don ia ka jingiakren.
“Baroh ar ki Sorkar ki lah dep ban iakren. Ym ha ka kyrdan ka jong nga, hynrei ha ka kyrdan jong u Myntri Rangbah bad tnad kam pohioing, ki lah dep ban iakren. Baroh arngut ki Myntri Rangbah bad ki Myntri Kam Pohiing ki dang don ha ka kam, shen ia kine kiei kiei baroh yn sa pynjaijai biang noh” ula ong.
U Bah Dhar ula bynrap ba ka KSU kala dep soi ia ka jingiatehkular ne Undertaking ha u Deputy Commissioner ba ka jingpynlong ia ka Rally kadei ban long kaba jaijai bad ka sorkar kan sa khmih bniah kumno ban pynbeit ia kane ka mat.
