Pyntreikam ka Sorkar ia ka MMPO Act ban phah siew ia ki jingjulor ha ka KSU | Pynsangeh ia ka jingbit ban iakhih la 21 tarik

Shillong, Nailar 21 : Ki bor district ka East Khasi Hills kan sa pyntreikam ia ka Meghalaya Maintenance of Public Ordinance (MMPO) Act, ban phah siew ha ka Khasi Students’ Union (KSU) ia baroh ki jing pynjulor ia ki nongkynti paidbah bad shimet ha ka jingiaid rally thuk thuk ba lam sha ki kam thombor ha ka sngi Balang.

Ka pyntip ruh ba kala dep ujor ia ka ejahar halor ka jingkawang petrol bomb sha ki Pulit ha ka por ba ki khynra ia ka Ophis ka KSU ha Jaiaw.

Lai ngut ki nongialam ka KSU-President samla Raymond Kharjana, Vice President samla Pynkmen lang Sanmiet bad General Secretary samla Reuben Najiar, kila shah kem hadien ka rally.

U Deputy Commissioner Abhilash Baranwal ha ka sngi Palei ula ong ba kane ka rally kala pynkhein ia ki kyndon ai jingbit bad kala kylla long ka jingialum paidbah ba be-ain.

“Ia ki kyndon pynlong rally la pynkhein da ka KSU. Ka don ka kyndon ha ka jingai jingbit ba lada ki pynkhein ia ki kyndon, kala kylla long kam beain bad ka jingai jingbit kam treikam shuh. Kumta kala long ka jingialum paidbah ba beain bad namar kata, ia ka ejahar la mudui bad ka jingtohkit ka la iaid shakhmat” ong u Baranwal.

U Deputy Commissioner u pyntip ba ki Pulit ki dang pyrshang mynta ban wad ban ithuh ia ki briew kiba donkti ha ka jingthang kali, pynjulor kali bad ba shoh ia ki nongiaid nongieng ha kane ka rally.

Haba ai jingtip halor ki jingjulor, u Deputy Commissioner ula ong ‘Wat ki kali shimet kila shah pynjulor, 16 ngut ki briew kila shah shoh, artylli ki mot u Netaji Subhas Chandra Bose bad Swami Vivekananda kila shah pynjulor bad artylli ki kali-kawei ka kali Sorkar bad kawei ka kali nabar Jylla- kila shah thang”.

Halor ka jingkhyllie pat ia ka jingjulor, u Baranwal ula ong “Ngin pyntreikam ia ka MMPO Act bad yn pynjari ia ka kyndon ban siew ia baroh ki jingpynjulor ia ki nongkynti paidbah bad shimet. Kat kum ka Act, ka seng lane ki briew kiba donkti ha kaban pynjulor kum shibynta jong kano kano ka jingiaid paidbah ne rally kin hap ban siew. Ngin sa pynmih noh ia ka hukum”.

U Deputy Commissioner ula pynbna ruh ia ka jingpynsangeh noh ia ka jingai jingbit sha ka KSU ba kan pynlong ia ka jingiakhih la sngi Thohdieng.

“Namr kane ka jingjia, wat ia ka jingbit bala ai na ka bynta ka rally thuk thuk, lyngba ki jingthoh bad ki jingiakren, la kular ha ngi ba kan long kaba rally kaba jai jai bad ba kan nym don ki jingjia thombor kumba jia ha ki snem bala leit. Hynrei, namar ka jingpynkhein ia ki kyndon bad ki jingthombor, ia ka jingbit bala ai na ka bynta ka jingiakhih lashai ka sngi, ngin sa pynduh noh” ula ong.

Halor ka jingkhynra Pulit ia ka Ophis ka KSU ha Jaiaw ha ka miet sngi Balang, u Baranwal ula ong ba ia ka ejahar la dep ban mudui ba kawang petrol bomb sha ki Pulit.

“Hadien ka jingkem ia ki lai ngut ki nongialam ka KSU, ki Pulit ki kwah ban kem ia kito kiba donkti bad kiba lah ban pynthikna ia ka jingdonkti ha ka jingthombor. Kumta, kila leit sha Ophis ka KSU ha Jaiaw. Hynrei haba ki poi ha kane ka Ophis, kila shah kawang petrol bomb. Namar kata, ia ka ejahar la ujor halor ka jingkawang petrol bomb” ula ong.

Ula ong ba ka jubab bala ai da ki Pulit ka long kaba biang. “Kam shym la don ka jingpyndonkam palat ia ki stun grenade lane tear gas, kila hap ban pyndonkam tang uwei u stun grenade bad tear gas tang ban pynpriang ia ki briew kiba pyrshang ban thombor ia ki Pulit. Hadien ka jingwan ki nongialam shnong, ki Pulit kila mih noh khnang ban nym pynmih ia ka huri hura kaba heh. Kam shym la don kano kano ka jingthmu na ki Pulit ban leit pynthut sha kito ki bym don bynta ha ka jingiakhih bad ka jingpyni bor ka dei na ka liang jong ki” ula ong.

U Baranwal u pyntip ba ka Sorkar kan sa pynmih ia ki helpline number na ka bynta ki nongjngohkai kiba sahkut ha kano kano ka jaka bad kular ban ai jingsumar ia baroh ki lanot kiba mynsaw.

Haba kylli la ki bor district kin pynjari korphiw, u DC ula ong ‘Ka korphiw hi ka dei ka sienjam kaba khatduh”.