Shillong, Nailar 19: U General Secretary ka UDP bad Nongialam ka Liang Pyrshah ha KHADC u Bah Titosstarwell Chyne hynne ka Sngi Baar, ula kyntu ia ka Sorkar Jylla ba kan pynsted noh ia ka jingtyrwa kaba la slem ban pynbna noh ia ka surok na Umtyngar sha Shella kum ka State Highway.
U Bah Chyne ula ong, ba ia kane ka jingdawa la rah nyngkong eh ha ka por jong u Dr Donkupar Roy (bam kwai ha dwar u Blei) hynrei haduh mynta ym shim la lah ban pynurlong satia.
“Kane kadei ka jingangnud jong ki paitbah ka thaiñ. Ngi kwah ba ka Sorkar kan pynkloi noh ia kane ka kam” ula ong.
Ula banjur ba kane ka surok kadei ban long ha ka kyrdan jong ki surokbah ne Highway ban ai jingmyntoi ia ki trai shnong bad ia ki nongjngohkai ym tang ia ki heh ki haiñ ne ki heh sorkar haba ki leitkai sha Sohra.
“Man la ki heh ki haiñ bad heh sorkar kiba wan jngoh ia ka jylla jong ngi, ki leit sha Sohra. Ngim dei ban pyrkhat tang halor kane. Ngi dei ban pyrkhat na ka bynta ki nongjngohkai bad ia ki paitbah” ong u Bah Chyne.
Ula bynrap ba ka jingpynheh ia ka bynta jong katei ka surok kan pynduna ia ka por jong ka leit ka wan. “Kan pynduna ia ka jingkhapngiah bad ia ka jingjrong bad kan pynlyngkot noh ruh ia ka por jong ka leit ka wan bad kan iarap ia ki briew ba kin poi kloi sha Sohra da10 ne 15 minit” ula ong.
“Ka jingkyntu ka jong nga ia ka sorkar ka long ban pynsted noh ia ka jingtyrwa khnang ba ka kyrdan jong ka State Highway ia katei ka surok dei ban ioh noh kloi katba lah” ula ong.
