Itanagar, Nailar 14: Ka sorkar Arunachal Pradesh ka la mynjur ia ki kyndon ba long ryntih na ka bynta ban thung kam beit beit sha baroh ki post jong ka Group A, B bad C ha ka jylla, hadien ba la weng noh ia ka jingpynbeit ba 80:20 ha ka bhah thung kam sorkar.
Ia ka bhah kyrpang kaba 80:20 la weng noh hadien ka rai jong ka kynhun myntri sorkar kaba la mynjur ia ki jingai jingmut jong ka High Power Committee (HPC) halor ki kyndon ba ryntih kumjuh ban ioh thung kam. La wanrah ha u snem 1991, kane ka policy ka la buh kyrpang 80% na ki kam sorkar jylla na ka bynta ki candidate jong ka Arunachal Pradesh Scheduled Tribe (APST), katba 20% la ieh sha kiwei pat.
Hapoh ki kyndon ba thymmai, u kyrtong u dei ban pyndep ïa lai tylli ki kyndon ba donkam ban ïoh thung kam beit sha ki kam sorkar jylla: ban don ïa ka Permanent Residence Certificate (PRC), ban bat ïa ka kyrdan APST bad ban pyni ïa ka jingtbit ha la kumno kumno kawei ka Indigenous Tribal Language of Arunachal Pradesh na ka thup ba la pynbna, ong u heh ophisar.
Ka kynhun myntri ka la bthah ruh ia ka Arunachal Pradesh Public Service Commission (APPSC) bad ia ka Arunachal Pradesh Staff Selection Board (APSSB) ba kin pynrung ia ki kyndon ba thymmai jong ka jingbit jingbiang ha ki jingpynbna thungkam bad ki kyndon shakri ki ban sa wan.Ka rukom test ktien hadien ba la rung kan long ruh shi bynta jong ka rukom thung kam.
Ki kyndon kin treikam mardor bad kin treikam ha ki kyndon thung kam bad jingshakri kiba synshar ia ki kam jong ka Group A, B bad C bad ki kam kiba iadei dur bad ki.
Ha ka jingthoh ha ka X, u Myntri Rangbah ka Arunachal Pradesh, u Pema Khandu u la ong ba ka jingnang la kumno kumno kawei ka ktien tynrai jong ka Arunachal Pradesh, ryngkat bad ka jingbit ban long ST bad PRC, kan long kaba donkam bha na ka bynta ban thung kam beit beit sha ki kam sorkar.
“Lada phi leit ban shakri ia ki paidbah jong ka Arunachal, phi dei ban lah ban kren la kumno kumno kawei na ki ktien jong ki briew jong ka”, la ong u Khandu.
Kane ka rai ka long ban pynkhlain ia ki kyndon ban ioh ia ka kam sorkar bad ban pynthikna ba ki candidate ki pyndep ia ki kyndon ba la buh da ki trai ri trai muluk.
