Shillong, Nailar 10 : U Bah Kwis Sumer na ka shnong Muktapur, East Jaintia Hills, uba la jah rngai naduh ka 15 tarik Naitung 2026, hadien ka jingleit wadkam sha Karnataka, la lap pat bad wan ialam noh sha Meghalaya ha ka sngi Nyngkong hadien ka jingwad ba khlem sangeh mynta la artaiew bad ka jingiatreilang hapdeng ki Pulit ka Meghalaya, Karnataka bad kiwei kiwei ki kynhun.
Ia kane ka jingjia la wanrah sha ka jingtip jong ka Sorkar Meghalaya hadien ka jingaiti ia ka dorkhas ha ka 27 tarik Naitung 2026.
U Myntri Rangbah ka Jylla Conrad K Sangma, ula shimkhia ban iakren mar mar bad ka Sorkar Karnataka, kaba la pynsted ia ka jingiatreilang hapdeng ki ar jylla bad ka jingpyndonkam ia ki agency bapher bapher ban wad ia u Bah Sumer.
Ka kynhun ki Pulit na Meghalaya ba ialam da u Lovish Garh, IPS, kala hiar sha Bengaluru ha ryngkat ki nongmihkhmat ka kur u Bah Sumer bad kala iatreilang bad ki Heh Pulit ka Jylla Karnataka, kynthup u DGP bad IGP, DIG (A) Bah Iada Martin Marbaniang, IPS. Lem bad ki Superintendent of Police. Ka kynhun kala iashong jingialang bad ki Pulit ka Karnataka ban pynwandur biang ia ka iaid ka ieng u Bah Sumer na ka jaka ba tip khatduh bad kila lah ban lap ia ka jaka ba u don lyngba ki kor bad ki jingtohkit.
Ia u Bah Sumer la lapdien hadien ka jingpyrshang jong u ban iakren bad ki bahaiing lyngba ki social media da ka jingiarap u Kavi Kumar, uba la ai jaka sah bad jingkyrshan ia u. Haba shimkhia mardor ia kane ka jingtip, ki Pulit ka Jylla ha ryngkat ki Pulit ka Karnataka, kila lah ban lapdien bad shem ia u Bah Sumer.
Ia u Bah Sumer la shem ba u don hapdeng ka jingshngain ha Tiptur, kaba hap hapoh ka Tunkum Distrct, bad la shimti noh ia u da ki borkhmih. La pynbeit ruh ia baroh ki jingdonkam ban wan ialam biang ia u sha Meghalaya, uba la iasoh biang mynta bad ki bahaiing hasem.
Ha Shillong, ia u Bah Sumer la pdiang sngewbha da ki bahaiing bad ki Kur bad la ialam noh ia u shala ka jong ka Iing ha shnong Muktapur.
U Bah Sumer ula pynpaw ia ka jingsngewnguh ia u Myntri Rangbah namar ka jingshimkhia ia ka jingioh wanphai suk jong u. Ia kane kajuh ka sur la pynpaw ruh da ki bahaiing hasem bad ka kur.
Ha ka kyrwoh, u Myntri Rangbah ula ong “Da ka jingiarap ki Pulit ka Karnataka khamtam ki Pulit ka Bangalore bad ka jingtrei shitom ki Pulit ka Meghalaya bad kiwei ki kynhun, ngi la lah ban lap pat ia u. Ula wan poi suk mynta sha ka Jylla jong ngi bad nga shim ia kane ka kabu sa shisien ban ai khublei ia barohh kila shim ia ka bynta, khamtam ki Pulit ha Bangalore bad ka Meghalaya kiba la pynthikna ha kaban shem ia u bad wan ialam pat ia u shala ka jong ka Jylla”.
U Myntri Rangbah u buh ha ka record ia ka jingsngewnguh kaba khraw ia ki Pulit ka Karnataka namar ka jingshimkhia mardor ban ai ka jingiatreilang bad ka jingiarap, ka kynhun ki Pulit ka Meghalaya ia ka jingtrei shitom jong ki, ki kynhun trei mon sngewbha kiba la ai ka jingkyrshan ha ka jingwad ia u Bah Sumer, u Dr D Rockyer L Nonglait, uba la shimkhia ban ai jingtip sha ka Ophis u Chief Minister, u Kavi Kumar, uba la ai jaka sah bad jingiarap ia u Bah Sumer, kaba la pynthikna ia ka jingshngain bad jinglah ban iakren bad la ki bahaiing.
