Guwahati, Nailur 10: U Myntri Rangbah ka Assam u Himanta Biswa Sarma ha ka sngi Nyngkong u la ong ba ka jingiakren ka dang iaid hapdeng ki chief secretaries bad ki heh pulit ka Assam bad Arunachal Pradesh hadien ka jingjia siat suloi ha khappud Assam- Arunachal, bad u la pynskhem ba ka Assam kan nym pyndem ia ki jaka la jong.
“Ka jingiakren ka la don hapdeng ki Chief Secretary ka Assam bad u Chief Secretary ka Arunachal Pradesh, bad ki DGP ruh ka dang iaid ka jingiakren”, la ong u Sarma.
Haba khot ban pynjem ia ka jingeh, u myntri rangbah u la ong ba dei ban tohkit ia kane ka jingjia ban lap ia ka jingkitkhlieh bad kito kiba lap ba donkti ki dei ban mad ia ka jingshah pynshitom.
“Ia kane jingsngewkhia dei ban pynduna, bad ngi dei da shisha ban tohkit bniah mano ki ba bah khlieh halor kane ka jinglong jingman ban ai ka jingpynshitom,” u la ong.
U Sarma u la ong ruh ba u la bthah ïa ki Pulit ka Assam ba kin peitngor ba kan ym don kano kano ka jaka jong ka Assam kaba lait khlem da ïada.
“Nga la bthah ïa ki Pulit ka Assam ba ha kano kano ka rukom ngim dei ban iehnoh shadien ïa kano kano ka jaka jong ka Assam, bad ki bor jong ngi ki la dep poi sha katei ka jaka,” u la ong.
Kane ka jingkynthoh kala wan hadien ba la don ka jingjia siat suloi kham ha shwa ha Mingmang Badati hapdeng ka jingïakajia halor ka jingkynnoh ba don ka jingthombor ha ki jaka ba la kam da ka Assam.
Katkum ki report, palat 8 ngut ki briew ki la mynsaw ha katei ka jingshah siat kaba la bud sa ka jingiakynad hapdeng ki nongshong shnong jong ki arliang mamla halor ka jingkynnoh ba ki shim ia ka jaka jong ka Assam.
