Shillong, Nailar 10: U Nongialam ka seng Congress u Bah Vincent H Pala hynne ka sngi Nyngkong ula ong, ba ka seng kala pynjur ia ka jingpynkhreh na ka bynta ka elekshon shiteng samoi jongka MP Lok Sabha kaban wan ha Shillong Parliamentary Constituency bad ula kynnoh ba kiba phet seng bad ki nongialam kiba la shah thied kidei ki daw bah jong ka jingtlot jong ka seng.
U Bah Pala ula ong, ba ka rukom pynkhreh bad pynbit pynbiang na ka bynta ka elekshon kadei kaba lah jan dep artad.
“Ngi lah dep ban pynbit pynbiang ia ka seng ha ka District bad Block Level. Mynta ngi dang iaid shakhmat na ka bynta ban pynbiang sa ha ka Booth Level. Na ka liang ka jong ngi, nga lah iaid pura bad baroh ki jingpynkhreh” ong u Bah Pala.
Ha kaba iadei bad ka thup kyrteng ki nongthep vote ne Electoral Roll, ula pynpaw ba ka seng kala khmih bniah bha ia ka Special Summary Revision.
“Ngi lah ioh ia ki jingtip na ka ophis treikam jong u DC bad na ka Block ruh kumjuh. Nga tharai shen yn sa pyndep pura noh ia ka SIR hapoh jong ka 7 tarik u Risaw yn sa pyndep pura noh” ula ong.
Haba phai sha ka rukom treikam jong ka seng, u Bah Pala ula ong, ba ka seng Congress kam shim la rem na ki nongthep vote hynrei kadei namar ka jingshah shet kylla na kiba napoh.
“Ka jingtlot jong ka Congress kam dei na ki nongthep vote, hynrei kadei namar ki nongialam kiba la shah thied noh. Ki briew ki hap ban sngewthuh ba lada ka Congress ka tlot, ka imlang sahlang ruh kan mad ia ka jingeh” ula ong.
Ula kyntu ia ki nongthep vote ba kin khmih bniah bha ia kum kitei ki jingphet seng hashwa ban wan ka elekshon shiteng samoi.
“Kumta, ki briew ki donkam ban pyrkhat shaphang kitei ki jingphet seng bad kito kiba la shah thied noh, mano ba thied ia ki, ka pisa ka jongno. Ki paitbah kidei ban pyrkhat bha halor kane” ong u Bah Pala.
Wat hapdeng ka jingtynjuh, u nongialam ka seng Congress ula pynpaw ia ka jingkyrmen ba ka seng kan sa khie im biang.
“Haba nga leit kylleng kylleng, nga iohi ia ki briew ba ki dang ieid ia ka Congress, hynrei kila shah ialam bakla ha ki katto katne ki riewshimet. Ngi lah shah pynrem tang katto katne por, hynrei phin sa iohi pat ba ka seng Congress kan sa kiew biang” ong u Bah Pala.
“Nga dang shu wan na Delhi bad nga lah ban iohi ba kan sa kiew biang bad nga kyrmen skhem ba ngin sa poi biang sha kajuh ka kyrdan kaba ka seng Congress ka ju don mynshwa. Ngi lah ban synshar bha bad ha ka lynti kaba biang bha ia ki paitbah”.
