Shillong Nailar 09: U Additional Deputy Commissioner, Pynursla Civil Sub-Division, ha ka sngi U Blei, ula pynmih ia ka jingpynbna ban plie noh ia ka bynta jong ka surok Shillong-Dawki (NH-206) bala khang, naduh ka 10 tarik u Nailar ban iaid baroh ki kali.
Katkum ka jingpynbna u Bah G. Warjri u ADC ka Pynursla Civil Sub-Division, ula iathuh ba ia kane ka jingpynbna la pynmih hadien ka jingwan jurip lang ha ka 8 tarik u Nailar bad ki heh ophisar jongka NHIDCL, Executive Engineer PWD (Roads), Pynursla Division, Pynursla.
Ula pyntip sha ki paidbah bad sha baroh ki nongleit nongwan ba ka surok Laitlyngkot-Lyngkyrdem (Chainage Kms 24+00 – 37+00) jongka Shillong-Dawki Road (NH 206) yn plie noh noh naduh ka 10 tarik u Nailar na ka bynta ban iaid baroh ki jait kali.
Ula pynpaw pat ba ka jingkhang ia ki kali ban iaid ha ka por mynmiet kan dang iai bteng naduh ka por 10 baje mynmiet haduh 5 baje mynstep bad la kyntu ia baroh ki nongleit nongwan ba kin bud ryntih ia kane bad ia ki jingbthah kiba la pynmih da ki bor kiba dei khmih.
Namar ka jingwan ka aiom lyiur bad ka jingslap kaba lah ban mih ki jingtwa khyndew, ka jinghap ki maw bad ka jingbym shngain ki surok, kumta la kyntu jur ia baroh ki nongleit nongwan bad ia ki paitbah ba kidei ban long kiba phikir bha haba ki leit jingleit lyngba katei ka surok.
Ula kyntu ia ki paitbah ba kin kiar ia kino kino ki jingleit ki bym donkam ha ka por ba jur bha u slap ne mar ia dep ther u lapbah bad ha ka por mynmiet.
Lah ban shah iaid ia ki kali kum ki Ambulances, Fire Service bad Pulit ha ki por ba khang ia ka surok bad ki lah ban phone ha Pynursla Police Station ha u Phone Number: 9862251116 khnang ban khmih ia ka jingshngain da ki bor kiba dei khmih kiba don ha katei ka jaka.
La kyntu ruh ia ki paitbah ba kin ai ka jingiatreilang bad ban bud ryntih ia ki rukom pyniaid kali kiba la pyntreikam na ka bynta ka bha bad ka jingshngain jong ki paitbah bad ban plie lad ia ka jingtrei kam ha ka por ia ka jingshna ia katei ka projek.
 bala khang, naduh ka 10 tarik u Nailar ban iaid baroh ki kali.){kind=link}