Shillong, Nailar 08: Ka jylla Meghalaya kan rakhe ia ka ‘Har Ghar Tiranga’ ha baroh kawei ka Jylla naduh ka 9 haduh ka 17 tarik Nailar 2026, ong ka Sorkar hadien ka jingialang ka state-level coordination meeting ba pyniaid da u Secretary ka tnad Community & Rural Development.
Ka jingrakhe mynta u snem kan long ruh ban kynmaw burom ïa ka jingdap 150 snem jong ka jingrwai Vande Mataram, ha kaba ïa ka jingrwai yn pynrung ha man la ki prokram baroh shi taiew.
U Myntri Rangbah ka Jylla u Conrad K Sangma un pynher ïa ka Lama Ri ha ka 14 tarik u Nailar ha ka jingïalang jong ka National Handloom Day ha RiSai, Ri-Bhoi District, kaba la pynlong da ka Directorate of Sericulture & Weaving.
Iaki lama lai rong yn shna daki Eri silk kiba dei napoh ka Jylla.
Ia kane ka jingrakhe la sdang ha ka 7 tarik Nailar haba rakhe iaka National Handloom Day.
La bthah ia baroh ki tnat ba kin ai ia ki plan bad ban pynher ia ka lama ka ri ha ki ophis katkum ka Flag Code.
Ka MSRLS kan pynbeit iaki jingialap ha baroh kawei ka Jylla.
La kyntu ia ki nongshong shnong ba kin iashim bynta daka ba shon dur lane“Selfie with Tiranga” kaba don ha harghartiranga.com, ha kaba tem iaka jingrwai Vande Mataram.
Ki Tnat kin buh ia ki jaka shondur ‘Selfie’ bad kin iasam ia ki jingtip ba thymmai man ka sngi. Kane ka jingialap kan ïahap ruh bad ka jingrakhe ïa ka sngi laitluid jong ka Ri ha Lok Bhavan ha ka 15 tarik Nailar.
Haki shnong ki thaw, yn ialap daki SHG haka jingiatreilang, Village Councils bad CBO ban kyntiew ia ka jingiashim bynta jong ki iing ki sem.
Iaki lama yn sam lyngba ki SHG bad ki nongdie jingdie ha ka thain, da kaba pyndonkam ruh iaki lama ba la don lypa.
Ka Sorkar ka la kyrpad ia ki nongshong shnong ban pynher ia ka lama lai rong ka ri ha ki iing ki sem bad ban iadon bynta ha ki jingialang ha ka thain ban pynsah kynmaw ia kane ka jingialap.
