Shillong, Nailar 04 : Ka Sawmer Sports Club ka la pynliem ia ka Rangdajied United FC da 2-1, ha ka Shillong Premier League 2026, kaba long ha ka nohphai sngi Ba-ar ha SSA Stadium, Polo.
Marsien sdang ka jingiakhun, ki la don ki kato katne ki jingpyrshang ban nion shakhmat na ka Rangdajied United FC ha kaba u Balamlynti Khongjee u la pyrshang ban shut jam bha ia ka bol sha u rang ap kol ka Sawmer Pyrshangbanbha Dkhar bad kumjuh wat na ka liang ka Sawmer u Banteilang Lyngdoh u la pyrshang lem ban ioh pynkhih ia ka jar ia kaba la lah ban kyrda noh da u rang ap kol ka Rangdajied u Meshan Banjop Sumer.
Ka kol kaba nyngkong ka la wan lyngba ka Sawmer SC kaba la ioh ba kan thep lyngba u Oresterwell Langshiang (18’) hynrei kane ka jingiohtam shakhmat kam shym la neh slem bad tang hadien 6 minit, ka Rangdajied United FC ka la ioh ia ka kabu ban pynphai lyngba u Pasborlang Khonglikong ha ka minit kaba 24.
Ka Sawmer SC kala ioh ia ka kol kaba ar ha ka minit ba 36 lyngba u Wanshanlang Dkhar bad tam biang da 2-1 kol haduh ba kut ka kylla step.
Haba wan phai sha ka kylla miet, ka Rangdajied ki la pyrshang ban wanphai biang sha ka jingiakhun, bad pynkylla wat ia ka buit ialehkai ban kyntur shakhmat.
Hynrei ka buit ialehkai kam shim la don jingktah satia ia ka kynhun ialehkai ka Sawmer SC, kiba la ieng iada bha ia ka jong ka kut ialehkai haduh ba kut ka jingiakhun.
Lashai pat ka sngi, ka jingiakhun kan long hapdeng ka Mylliem SC pyrshah ia ka Laitkor SC, kaban long ha ka por 4 baje nohphai sngi.
Kine ki ar kynhun ki rung sha kane ka jingiakhun hadien ba ka Mylliem SC ka la shu shah liem salit da 1-0 hakhmat ka Nongkseh SSCC katba na ka liang ka Laitkor SC pat kan mad ia ka namrem kaba long da 5-0 hakhmat ka Mawlai SC.
Kumta kane ka jingiakhun kine ki ar kynhun lashai ka sngi la khmih lynti ba kan iakhaid bad biang bor bha, namar baroh ar kin donkam ban khur ia ki nam jop kum shi bynta ban iai don ha ka thong ban lah ban jam shakhmat ha kane ka samoi ialehkai ba mynta ka SPL.
