Shillong, Nailar 03: Ka Indian Red Cross Society, Meghalaya State Branch ha ka sngi Nyngkong, ka la leit ai jingiarap shaki lanot kiba la shah ktah ha ka jingpluh iing ha Rilbong Zig Zac, Laban, Shillong kaba la jia haka 1 tarik mynta u bnai.
Ka Indian Red Cross Society, ka la noh synñiang da ki Tarpaulin, ki tiar shet jingshet, ki jaiñ bad kiwei ki tiar ba pyndonkam man ka sngi.
Ïa kane ka jingleit ai jingiarap la ïalam da u General Secretary jong ka Indian Red Cross Society, Meghalaya State Branch u Andrew N Sawian, ha ka jingiadon lang u Deputy Commissioner East Khasi Hills District u Abhilash Baranwal, ADC D Kharshiing, MCS ryngkat kiwei pat kiba la noh synniang ha ki lanot.
Ka Red Cross ka pyntip ba ka ju kyrshan ia ki lanot haba ioh ia ki jingtip na ka DDMA bad ka ju hiar hi dalade shaki jaka ba shah ktah ban pynshisha khnang ban sngewthuh ban leh iaka jingdonkam naka bynta ka jingmyntoi ki lanot.
Ha kane ka sngi ka Red Cross ka la aiti ïa ki tiar jingïarap sha u Deputy Commissioner bad Addl Deputy Commissioner.
Ki nongïoh jingmyntoi ki pynpaw ruh ïa ka jingsngewnguh ïa ka Red Cross na ka bynta ki jingleh sbun jong ki bad ruh ki kitbok kitrwiang ba ka Society kan nang kiew na ka por sha ka por khnang ban lah ban ïarap ïa kiba donkam ha kum kine ba jia jingjia ba sngewsih.
