Shillong, Nailar 03 : Ka Khasi Students’ Union (KSU) kala aipor 15 sngi ia ka Sorkar Jylla ba kan leh eiei halor ki 5 tylli ki mat jingdawa ba sahteng, haba maham ba lada kam lah ban leh eiei, kan pynbor ia ka seng ba kan pynsdang ia ka jingiakhih ha ka Jylla baroh kawei.
Ha ka shithi sha u Myntri Rangbah Conrad K Sangma, ka KSU kala ong “ (Ngi) pynpaw ia ka jingbym sngewtynnad bad jingbitar ia ka rukom leh donbor jong ka Sorkar Jylla ha ka jingjia ba dang shen ha East Jaintia Hills bad ruh halor ka jingthok bad jingshukor ba ka Sorkar kala leh ban pynslem ia ki mat jingdawa la bun bun snem”.
“Namar ki jingiakren ba bun sien bad ki jingialang kim shym la lah ba pynmih ia u soh uba sngewtynnad, ka seng kam don lad pat hynrei ban ai ia ka Sorkar Jylla ka jingaipor ba 15 sngi ba kan pynbeit ia ki mat jingdawa ba sahteng bala kdew harum bad lada ym don jingmih eiei, ka seng kan hap ban iakhih yad haduh bala pyntreikam ia ki jingdawa” kala ong.
Ka KSU kala pynpaw ia ka jingbym sngewtynnad kaba jur halor ka rukom leh ia ka jingjia ba dang shen ha East Jaintia Hills, khamtam ka public hearing na ka bynta ka Shree Cement kaba la jia ha ka 31 tarik Naitung, 2026.
Ka seng kala kynnoh ba ki bor district, ki pulit bad ka Meghalaya State Pollution Control Board (MSPCB) kila trei ban kyrshan ia ka kompani bad khanglad ia ki briew kiba pyrshah ia ka project ba kin rung sha ka jaka ba long ka hearing.
Ka KSU kala pynpaw ruh ia ka jingpyrshah kaba jur ia ka jingkren u Symbud Myntri Rangbah Bah Prestone Tynsong ha ka 29 tarik Naitung, kaba iadei bad ka Meghalaya Residents Safety & Security Act, 2016.
Ka KSU ka ong ba ka Sorkar kala pynslem ban pyntreikam ia ka MRSSA da ki snem wat hadien bala dep thied ia ka jaka bad la dep ioh ia ka pisa na ka bynta ki facilitation centre ha ki entry bad exit point.
Ka dawa ban pyntreikam noh maror ia ka Act ryngkat ka jingleit pynthikna da ka met ia ki nongshong wai da ki Dorbar Shnong, bad dawa ia ka Sorkar ba kan aiti ia ka kaiphod ba shisien shitaiew halor ka jingiaid ka kam ban buh ia ki centre.
Kawei pat ka mat jingdawa ka iadei bad ka amendment u snem 2024 ba iadei bad ka Meghalaya Identification, Registration and Safety of Migrant Workers Act.
Ka KSU kala pynpaw ba ka kynhun Myntri kala mynjur ia ka amendment ha ka 3 tarik Nailar, 2024 ban pynlong ia ka jingpynshisha da ki Pulit bad ban pynlong kongsan ia ka jingpynrung kyrteng, hynrei ka Sorkar kan dang ban pyntreikam ia kane ka act mynta la jan arsnem.
Ka KSU ka ong ba kane ka jingpynslem kala ailad ia ka jingrung kyrthep ki briew ba nabar bad buh ha ka jingma ia ka jingshngain jong ki nongshongshnong.
Halor ka kam thungkam ha NEIGRIHMS, ka KSU kala pynkynmaw ia ka jingleit shong kyllain myngor ha u bnai Jymmang 2025 halor ka kam ba kynthup ia ka ratio thungkam ia ki nurse bad ka jingai bhah ia ki riewlum trai muluk.
Ia ka jingiakhih la pynsangeh shipor hadien ba ka Sorkar Jylla, hapoh ka jingialam u Myntri Sorkar Bah Paul Lyngdoh kala kuklar ba ia ki jingdawa yn sa rah iakren bad ka Ministry of Health and Family Welfare.
La shisnem mynta, ka KSU ka ong ba kam shym la don ka jingbuddien na ka Sorkar Jylla bad dawa ia ka Sorkar ban pynbeit kyrkieh noh ia kane ka kam.
Ka seng kala dawa ruh ban pynkylla noh kyrkieh ia ki kam ba iadei bad ka thungkam thungjam.
Kala dawa ba dei ban pynduh noh ia ki personal interview na ka bynta ki kam Grade B non-gazetted, Grade C bad Grade D kaba long kat kum ka kyndon ka DoPT khnang ban pynthikna ia ka thungkam thungkam kaba shai.
Ka KSU kala ban jur ia ka jingpynkylla ia ki rukom pyniaid kam ha MPSC bad DSC, da kaba ong ba watla ia ki katto katne ki jingai jingmut jong ka MPSC Reform Committee 2025 lah dep ban pdiang ban pyntreikam, hynrei kiba bun ki dang sahteng.
Ka pyrshah ia ki jingpynbna laitkam ka MPSC ia ki nongthep kam kiba dei ki “nongshongshnong ba dei hok ka ri India” bad ban jur ba ka thungkam thungkam ha Jylla ka dei ban long beit thik ia ki nong shongshnong ka Jylla Meghalaya.
Kala bynrap ruh ba ka Sorkar Jylla kam pat shym la pdiang satia ia ki 15 tylli ki mat bala aiti sha u Chief Secretary ha u Risaw 2024 ba iadei bad ka jingpynkylla ia ka rukom treikam ha ki DSC.
Ka KSU kala pynkynmaw ruh ia ka Sorkar halor ka jingkular ban mynjur ia ka resolution pyrshah ia ka jingtih uranium bad dawa ia baroh ki Autonomous District Council ba kin thaw ia ka ain halor kane ka kam bad ban pynkynriah noh ia ka Ophis ka Atomic Minerals Directorate na Nongmensong.
