Mynjur ka Sorkar Jylla ia ka EV Policy | Tyrwa ia ka song jingmyntoi ba T.25,000 nalor ka registration ei

Ai jingmynjur ia bun ki kam ban pynkhlain ia ka jingpynmih bording

Shillong, Naitung 27 : Ka Kynhun Myntri ka Sorkar Jylla ha ka sngi Nyngkong, kala ai jingmynjur ia ka Meghalaya Electric Vehicle (EV) Policy, 2026, kaban plie lynti ia ki jingioh jingmyntoi kiba thmu ban pynkloi ia ka jingpyndonkam ia ki kali Electric ha baroh kawei ka Jylla.

Ka kynhun Myntri kala mynjur ruh ia ki jingtyrwa ban pynkhlain ia ka kam pynmih bording, kynthup ka jingthung ia u Chief Technical Advisor bad ka jingsiew bai jaka na ka bynta ki project jingtei ban pynpoi bording.

Haba kren sha ki lad pathai khubor hadien ka jingialang, u Myntri Sorkar Marcuise N Marak ula pynbna ba ka Sorkar kan ai ia ki jingmyntoi ba T.25,000 sha man ki briew kiba thied ia ki kali electric. Nalor kata, ia ka bai register na ka bynta ki kali EV yn pyllait pura khnang ban lah pynlong ia ka jingbujli sha ki kali ba khuid kaba kotbor.

“Ka Kynhun Myntri kala mynjur ia ka Meghalaya Electric Vehicle Policy 2026. Ban pynshlur ia ki briew ba kin pyndonkam noh da ki kali elektrik, ka Sorkar kan ai ia ka jingmyntoi ba T.25,000 sha man ki briew ba thied kali elektrik. Nalor kata, ia ka bai register run un pyllait pura” ong u Marak.

U Marak ula pyntip ba ka Jylla mynta kala dep don ia palar 5000 tylli ki kali elektrik ha surok bad kane ka policy la khmih lynti ba kan sa nang pynbun shuh shuh ia ka jingdon ki kali elektrik.

Kane ka policy kan treikam ia ki kali arshaka, lai shaka bad ki kali saw shaka, ula ong.

Halor ki jingtei, u Myntri ula pynpaw ba ka Sorkar kam iohi satia ia kano kano ka jingeh ha ka jingbuh ia ki charging station.

“Ki charging station ki lah ban mih hangno hangno. Na ka bynta ki commercial station, ngi la dep ban ithuh lypa ia ki jaka kiban sa buh ia ki” ula ong.

Ka kynhun Myntri kala iakren ruh halor ka Vehicle Scrappage Policy, bala pynmih jingpynbna ha u snem bala lah. Hapoh kane ka plan, ki trai kali kiba die scrap ia ki kali bala rim palat 15 snem ki lah ban pyndonkam ia ki certificate ban thied ia ki kali EV ba thymmai bad ioh ia ki jingmyntoi.

Ka kynhun Myntri kala mynjur ruh ban thung ia u Bah BM War, Chief Engineer (Civil) bala shongthait ka Meghalaya Energy Corporation Limited (MeECL), ban long u Chief Technical Advisor (Generation) ka Tnad Bording, haba shim ia ka jingshemphang jong u ban kyrshan ia ka kam pynmih bording hapoh ka Jylla.

Ha kawei pat ka rai kaba kongsan, ka Kynhun Myntri kala mang T.22.37 klur sha ka jingsiew bai jaka na ka bynta ban tan ia ki sainar borbing ba 132KV ba jrong 6.5 Km, kaba pyniasoh ia ka 220/132KV Secondary Substation sha ka 132/33KV, 2×50 MVA Mawkhanu Substation ba la tyrwa. Kane ka jingmynjur ka kynthup ruh ia ka bailutksan na ka bynta ka Right of Way (RoW) ne lynti pyniaid sainar, ban lah pynkloi ia ka jingpyntreikam ia ka project.