Shillong, Naitung 26 : Da ka jingnang tuid ki nongjngohkai sha Sohra, ki dkhot ka Hima Sohra Tourist Assistant Team ha ka sngi Saitjain, kila iamih sha surok ban ialap pyrshah ia ka jingpynjaboh ia ka thain-kaba dei kawei na ki jaka jngohkai ba khring eh ia ki nongshangkai.
Kane ka kynun kala sam ia ki kot lyngkdop sha baroh ki nongwanai bad ki trai shnong, kaba kyrpad ia ki ban kiar na kaba shet bam, bam jingbam harud surok bad bret ia ki jaboh sharud shakiar hapoh ka thain.
Ka kynhun kala buh ruh ia ki kynhun ki ban iaid pahara na ka bynta ban bthah iaki nongwankai kiba pynkhein ia ki kyndon ba kin mih noh na ki jaka kiba la khang pyrshah.
Ka Sohra, kaba la pawnam na ka jingdon ki kshaid, ki jingkieng jri bad ki lum ba tap da u lyoh, ka dang iai long kawei na ki jaka jngoh kai kaba khring duh ia ki nongshangkai hapoh ka Jylla.
Kane ka jingialap ka kwah ban pynthikna ba kane ka sor kan iai neh ha ka jingdon ia ka mariang kaba itynnad hapdeng ka jingnang bun ka jingwankai ki briew na kylleng sawdong.
Haba buh ia ka jingkyntu, kane ka Tourist Assistant Team kala khot ia ka jingiatreilang jong ki paidbah ban iada ia ka mariang.
“Ngi kyntu ia baroh ba kin iatreilang bad ka Hima Sohra Tourist Assistant Team da kaba kiar ban iashet bam, iabam jingbam harud surok bad ban bret jakhlia, khnang ban lah pynneh ia ka jingitynnad jong ka Sohra” ong ka kynhun.
Lah ban kdew ba ka Hima Sohra bad ka Ophis u Deputy Commissioner ka East Khasi Hills, kila pynmih teng ia ka jingmaham ba khang pyrshah ia ki nongjngohkai ba kin pynjakhlia ia ka thain Sohra.
Ka bor District kala maham ba kito kiba shem ba ki pynkhein ia ki kyndon ban pynneh ia ka jingkhuid, kin mad ia ka jingshah dain kuna ba kot T.5,000.
Ia kane ka jingialap ban pynsngewthuh paidbah la ialam da u President Alexon Diengdoh bad Secretary Pynlang Shangpliang jong ka Hima Sohra Tourist Assistant Team.
