Shillong, July 22: U Myntri Rangbah ka Jylla Conrad K Sangma ula kyrpad ia ka Sorkar Pdeng ba kan tuklar lem ha kaban lah pyntrei sted noh ia bun tylli ki project liengsuin ha Jylla, kynthup ka jingpynheh ia ka Shillong Airport, ka jingpynim ia ka Baljek Airport ha ri-lum Garo bad ka jingtei ia ka water aerodrome ha pung Umiam, da ka jingthmu ban pynkhlain ia ki lad pyniasoh liengsuin hapoh ka Jylla.
Ha ka jingiakynduh bad u Myntri ka Ministry of Civil Aviation Minister Kinjarapu Rammohan Naidu ha New Delhi ha ka sngi Nyngkong, u Conrad ula ong ba ka Sorkar Jylla kala pyndep iala ka jong ka bynta halor ki project bala tyrwa bad kyrpad ia u Myntri ban pynkloi ia ki jingai jingmynjur ban lah pyntyllun noh shakhmat ia ki.
U Myntri Rangbah ula pyntip ba ka project kaba hakhmat eh ka dei ka jingpynheh ia ka Shillong Airport ha Umroi. Ka Jylla kala aiti ia ka jaka ba 22 acre sha ka Airport Authority of India (AAI), ki environmental clearance kila don, bad ka AAI kala aiti ia ka kam ban pyntrei pynheh ia ka surok liengsuin (Runway).
” Shisien bala dep kine ki kam, ka surok liengsuin ba kham jrong kan ailad ia ki liengsuin ba kham heh kum ka A320 ba kan wan shakri, plie ia ka lad ban pyniasoh ia ki liengsuin beit beit sha ki sorbah bad pynduna ia ka jingshaniah ha ka jingiaid lynti kaba jngai lyngba ki surok na Guwahati” ula ong.
U Myntri Rangbah ula Kyrpad ia ka Directorate General of Civil Aviation (DGCA) ban ai ia ka jingbit ban pyntrei kam khnang ban lah sdang noh ia ka kam bala aiti ban pyntrei, da ka jingweng ia ki jingwit ha ka jaka iaid ki liengsuin. Ka Jylla kala pynlut nalade ban pynkhuid ia kine ki jingwit, kynthup ka jingpynkynriah ia ka Shnong Umden Mission ba T.150 klur, bad kala pynskhem ia kane ka jingkular hakhmat ka Iingkashari High Court ka Meghalaya.
Na ka bynta ka ri-lum Garo, ka Jylla kala kyntu ia ka AAI ba kan Shimti ba kan Shimti ban pyniaid ia ka Baljek Airport ha Tura kum ka Kad ba pura ka AAI, haba tyrwa ban kynshew nalade ia ka jinglut jong ka project ba kot T.63.67 klur.
Ia kane ka kad la tyrwa ban pyniaid da ki bynta bynta, kaba sdang da ka liengsuin ba 19 seat bad jam sha ka ATR-72 bad A320.
U Myntri Rangbah ula pan ia ka jingbei tyngka lyngba ka Regional Connectivity Scheme (RCS-UDAN), ha kaba yn sa pynphai pat ia ka jingkynshew tang mar syn ai jingmynjur ia ka project.
Artylli ki heliport ha Shillong bad Tura lah dep ban mang pisa bad kila don hapdeng ka jingpyntrei ia ki kam. Ka Jylla kala ithuh biang sa ia khyndai tylli ki jaka ha ki district Headquarter bad ki jaka jngohkai, bad pan ia ka jingbei tyngka ia kumba artylli na ki napoh ka RCS-UDAN ryngkat bad ki jingwad bniah ia ka jinglah ban pyntrei ia ki kam jong baroh ki project.
Hadien ka jingjop ka jingpyni ia ka jing treikam ki liengsuin duriaw bala pynlong ha pung Umiam ha u bnai Naiwieng 2024, ka Jylla kala pan ruh ia ka jing bro tyngka ia ka water aerodrome ha Umiam hapoh ka RCS-UDAN bad ka jingpynkhreh ia ka detailed project report, kaba tyrwa ia ka Umiam kum kawei na ki san tylli ki aerodrome kaba la bynshet ha ka AAI ba kan pyntrei.
