Shillong, Naitung 18: U Myntri Sorkar Jylla u Bah Sanbor Shullai uba dei ruh u MLA ka South Shillong Constituency u Bah Sanbor Shullai ha ka sngi Saitjain ula plie paidbah iaka Iewdie lang ka Shillong Municipal Board kaba don ha Iew Dak Laban.
Ia kane ka Iew Municipal kaba don saw mala, la bei tyngka daka North Eastern Council (NEC) ka Sorkar Pdeng haka jinglut kaba T.14.27 klur, kaba la wan lyngba ka jingai jingmut u MLA u Bah Sanbor Shullai ha u snem 2022.
Ka Iew Municipal Market ha Iingdak Laban ka dei ka iew kaba don bun tylli ki jaka shong die jingdie naduh ki jhur, ki doh bad kiwei ki jait marbam bad kiwei ki tiar kiba ju ioh ha man la ki iew ki hat. Ia ka khrum la pynlong kum ka jaka pynieng kali na ka bynta ki nongshong iew bad ki nongthied nongpet.
Nalor ki dukan (stall), ka Municipal Market ka don ruh ki kamra ban pyndonkam kum ki office, ka Dorbar Hall, ka Lift naka bynta ban pyndonkam haba leit sha ki bynta ba kham halor jong ka Market, ki jaka leit shabar bad kiwei kiwei de ki jingdonkam.
Ha kane ka sngi la don lang u Secretary ka North Eastern Council (NEC) u SK Bhalla, u CEO ka Shillong Municipal Board u PK Boro, ki Rangbah Shnong, ki nong shong Iew bad ki riew paidbah.
Haba kren ha kane ka sngi u Bah Sanbor Shullai ula iathuh ba ka jingtei iaka Iew kala pynurlong iaka jingphohsniew jong u lem bad kiwei ki riew rangbah ka thain Laban baroh kawei namar la bun bun snem kila angnud ban tei daka Iew kaba paka ban ai jaka iaki nongshong shnong ban ioh kamai daka shong dukan.
U Bah Sanbor ula ai khublei ia u Myntri Rangbah ka Jylla u Conrad K Sangma bad ki kynhun Myntri Sorkar namar ka jingkloi ka Sorkar MDA ban mang tyngka naka bynta ban pynoi iaki skhim bapher bapher kynthup iaka Municipal Market.
“Ngi la pynkhreh sa kawei ka skhim kata ban shna pynbha iaka bynta ba sha jrong jong ka Municipal Market kata ban shna sa kawei ka Hall na ka bynta ban pyndonkam ki paidbah bad ia kane ka Hall la mang haka jinglut T.2 klur bad iaka kam ruh yn sdang pyntrei noh mynta u bnai” la ong u Bah Sanbor.
U Bah Sanbor ula iathuh ruh ba la mang T.35 klur naka bynta ki kam pynroi hapoh ki jaka ba hap hapoh ka Cantonment ha kaba T.18 klur la dep ban pyllait naka bynta ban sdang noh iaki kam ha u bnai ban wan.
Hashuwa kane, u Bah Sanbor u la plie ia ka surok kali bad nala um ba la shna lang ha ka jinglut kaba T.1.65 klur kaba don marpyrshah iaka Municipal Market.
