Shillong, Naitung 06 : U Symbud Myntri Rangbah Bah Sniawbhalang Dhar ha ka sngi Nyngkong, ula ban biang ba ka nongrim jong ka Sorkar Jylla halor ka kam tih Uranium ka long “kaba shai kdar” – kan ym shah ban tih hapoh ka Jylla.
U Bah Sniawbha ula ong ba ka Sorkar ka ieng skhem bad u paidbah halor kane ka kam bad kan ym don satia ka jingkylla ha ka nongrim jong ka Sorkar.
“Ngi la kren shai halor kane. Ngin ym shah ban tih Uranium ha Jylla. Ka Sorkar Jylla ka ieng ha ryngkat u paidbah. Kat kaba long bad u Uranium, ngi la kren shai ba ngi don ha ryngkat u paidbah ka Jylla Meghalaya” ula ong haba iakren bad ki nongthoh khubor.
Kane ka jingkynthoh kala mih hadien ki jingkynnoh jong ka KSU ba kato katne ki MLA barim kila thied jaka ha Domiasiat ha ka dor kaba tad bad pyrshang ban pynkohnguh ia ki trai shnong ba kin pdiang ia ka jingtih Uranium.
U Bah Sniawbha ula pynpaw ba um don jingtip halor kane ka jingkam, hynrei ula ban jur ba ka jingtih kam lah ban iaid shakhmat katba ka Jylla baroh kawei kam pat mynjur lang.
“Ngam don jingtip ia kane. Tang kawei ka long ba ia ka jingtih Uranium yn ym shah katba ka Jylla baroh kawei kam pat mynjur lang” ula ong haba bynrap ba ka Sorkar Jylla kan sa shong bishar halor kane ka jingkynnoh.
Ula ong “Khlem pep, lada don ka jingkynnoh, ka Sorkar kan pynshisha la ka dei kaba shisha ne kaba bakla. Kane ka dei ka kam kaba hakhmat eh”.
Halor ka jingkam ki nongshongshnong ba ka thain kala shah pynduh kam pynroi namar ka jingpyrshah ia ka jingtih Uranium, u Bah Sniawbha ula kyntait ban pdiang ia kane.
“Kane ka dei kaba bakla shibun. Phi iohi, haba ngi ai ia kano kano ka kam pynroi, ka Sorkar kam ju don ia ka jingtharai sniew ha lyndet jong ka. Ka kam pynroi ka dei ka kam pynroi. Ka Sorkar kala sam mar katjuh ia ka kam pynroi ha kylleng ka Jylla” ula ong.
Halor ka jingud ia ka jingsniew ka surok bad ka jingbym biang ki jaka sumar, ula ong ba ka Sorkar kala pyrshang ban pynjanai ia ki lad pyniasoh ha baroh kawei ka Jylla.
“Ka surok kala don, hynrei ngi la pyrshang kat kaba lah kum ka Sorkar ban ai surok ha baroh kawei ka Jylla. Hynrei, hooid, ngim ong ba ngi la ai ia ki surok kiba paka kat sha kiba dawa. Hynrei kum ka Sorkar ngi sngap ia ka jingdawa u paidbah, bad kat kaba ka lah, kala ai ia ka surok” ula ong.
