Nongpoh, Jymmang 02 : Ka Khasi Students’ Union (KSU)-North Khasi Hills, kala ieng skhem ha ka nongrim ban pyrshah jur ia ka jingthmu jong ka Sorkar ban pynkylla ia ka Umling Facilitation Centre jong ka ain Meghalaya Residents Safety & Security Act (MRSSA) sha ka Food Court.
Ka KSU-NKH kala pynpaw ia kane ha ka jingiakynduh bad u Deputy Commissioner ka Ri-Bhoi Abhishek Saini ha ka sngi Palei ka jingia donlang u Superintendent of Police Giri Prasad.
Kine ki bor k aka District kila khot iakren ia ka KSU-NKH hadien ka jingleit khang ia ka jingshna ia ka food court ha ka jaka ba don ha facilitation centre myn ha ka 30 tarik Jylliew, ka centre kaba la tei ha u snem 2020 ban khmih bniah ia ki kot ki sla jong ki briew kiba wan rung sha Jylla.
“U Deputy Commissioner ula khot ia ki nongialam ka Seng halor ka jingkhang ia ka food court bad ula pyrshang ruh ban kyrpad ba ka seng kan ailad ia kane ka jingtei haba aidaw ba kan aikam aijam ia ki samla ka dong ka thain” ong u President ka KSU-NKH Bah Ferdynald Kharkamni haba iakren bad ki nongthoh khubor hadien ka jingialang.
Ula pyntip ba ka KSU kala pynpaw ba da lei lei ruh kan ym ailad ban pynieng ia ka food court ha kane ka jaka kaba la mang ban khmih bniah ia ka rung ka mih ki briew ba wan nabar ka Jylla.
Halor ka jingkam ba kan aikam aijam lyngba ka food court, une u nongialam ula buh jingkylli kylla “shano ki jah ki 32 ngut ki Data Entry Operator kiba la thungkam ha ka por ba pyntreikam ia kane ka fecilitation centre”.
U pynpaw ba ka centre ka la aikam aijam ia ki samla naduh u snem 2020 bad ka dei ban pyndonkam ia ki ban wanrah ia ka jingshngain ia ka Jylla da kaba pyrrkhing ia ka rung ka mih ki briew ba nabar ka Jylla.
-North Khasi Hills, kala ieng skhem ha ka nongrim ban pyrshah jur ia ka jingthmu jong ka Sorkar ban pynkylla ia ka Umling Facilitation Centre jong ka ain Meghalaya Residents Safety & Security Act (MRSSA) sha ka Food Court.){kind=link}