SHILLONG, JUL 1: Ka jingioh ia ki jingtip lyngba ka Satellite, shen kan pynkhlain ha kaban ithuh lypa ia ki jingpang bad ka jingpynkhreh ia ka koit ka khiah na ka jingkylla ka suinbneng ha ka jylla Meghalaya bad ka thain shatei lammihngi, hadien ba kala don ka jingiasoi ia ka MoU ha ka sngi Baar hapdeng ka Indian Institute of Public Health Shillong (IIPHS) bad ka North Eastern Space Applications Centre (NESAC).
La soi ia katei ka MoU da u Dr S P Aggarwal u Director jongka NESAC bad u Dr Sandra Albert u Director ka IIPHS ha jaka treikam ha Dhanketi, kane ka jingiateh kular kadei ka dak jong ka jingshim ia ka sienjam ban pyntreikam ia ki kor teknoloji jong ka ISRO ban wad bniah ha kaba iadei bad ka koit ka khiah ha ka thain.
Kane ka jingiatreilang kan pyniasoh ia ki jingtip jong ka koit ka khiah ki paitbah bad ki Satellite kiban ioh pdiang na ka mariang bad ki jingtip kiban lum na ka jinglong jingman jong ka suinbneng ban pynwandur ia ka Geo-Statistical Models.
Kine ki Model kin pyni ia ki jaka kiba jur bha ia ka jingma, ban lap ia ka jingsdang mih ki jingpang ha ki jaka, ban iathuh lypa ban khie ka jingpang bad ban thew ia ka jingkylla ka suinbneng kaban ktah ia ka koit ka khiah.
Ki Ophisar kila ong, ba kine ki tiar kin iarap ha kaban ai kloi ia ki jingmaham bad ban btin ban shim ia ki lad ban tuklar, khamtam eh ha ki jaka kyndon kiba don ha ki jaka lum kaba mad jingeh na ka jing bym don ia ka um hapoh khyndew.
Kane ka jingiatreilang kan kynthup ruh ia ka jingai jinghikai bad ki jingpynwandur ia ki rukom treikam da ka jingioh jingtip lypa ia ka jinglong jingman jong ka suinbneng ban pyndonkam bha ia ki jingdon jingem bad ban pynkhlain ia ka rukom long ka koit ka khiah kaba lah ban kyrda.
Kane ka sienjam kadei ruh kaba la khmih lynti ba kan kyntiew ha kaban iada na ki jingpang, tehlakam bad ka jingpynkhreh baroh ia ka koit ka khiah ki paidbah ha kylleng jong ka jylla Meghalaya bad ka thain shatei lammihngi baroh kawei.
 bad ka North Eastern Space Applications Centre (NESAC).){kind=link}