Guwahati, Jylliew 30: Katba u slap ba jur u dang bteng ban pynjulor ha kylleng ka jylla Arunachal Pradesh bad Assam, kaba wanrah ïa ki jingshlei um bad jingtwa khyndew kiba shyrkhei, ka sorkar kmie ruh ka la pynjur ïa ka jingkyrshan ïa kine ki ar tylli ki jylla.
U Myntri kam Pohiing ka Ri Amit Shah u la ïakren bad ki Myntri Rangbah jong baroh ar tylli ki jylla bad pynthikna ïa ki ban ai jingïarap ba pura na ka bynta ki jingpyrshang ban pynlait im ia ki briew bad pynbiang ïa ki jaka ai jingsumar shipor.
U Shah u la pynlong ïa ka jingïakren lyngba ka telephone bad u Myntri Rangbah ka Arunachal Pradesh u Pema Khandu bad u Myntri Rangbah ka Assam u Himanta Biswa Sarma ban bishar bniah ïa ka jingeh kaba dang ïai bteng na ka daw ka jingshlei um, ka jingtwa khyndew bad ka jinghap slap ba khlem sangeh.
Hadien ka jingiakren bad u myntri kam poh iing, u Himanta Biswa Sarma u la iathuh ba u la iathuh lyngkot ia u Shah halor ki lad jingiarap bad pynbha kiba dang iaid shakhmat ha ka Dhemaji district kaba la shah ktah ha ka jingshlei um.
“U la pynthikna ia ngi ia baroh ki jingkyrshan bad jingiarap kiba lah na ka Sorkar India ban ialeh pyrshah ia kane ka jinglong jingman,” la ong u Sarma, da kaba ai khublei ia u Union Home Minister uba la bishar bniah hi dalade ia ka jinglong jingman jong ka jingshlei um.
Ka Arunachal Pradesh, ka dang ïai bteng ban mad ïa ka jingeh, ha kaba ka jinghap slap kaba khlem sangeh, ka la wanrah ïa ka jingshlei um kaba jur bad ka jingtwa khyndew ha kylleng ki shiphew tylli ki district. Ki surok bad ki jingkieng ki la shah pynjulor, kaba la pynduh noh ïa ka jingïadei sha ki katto katne ki shnong, katba ki jingpyrshang ki dang ïaid shakhmat ban pynkhuid ïa ki jaboh jabaiñ bad ban pynphai biang ïa ki jingshakri kiba kongsan. Ki shipai ka Indian Air Force ka dang ïarap ruh ïa ki kam pynlait im ha ki katto katne ki jaka ba la shah ktah jur bha.
Kane ka jinglynshop ka la dep ban shim ia ki bun ngut ki mynsiem briew, kynthup ia u Rupam Rabha uba la 35 snem ka rta uba dei na ka shnong Boko jong ka Assam, uba la khlad noh hadien ba ka jingtwa khyndew kaba la tap lang ia ka excavator kaba u trei hajan Walong ha ka Anjaw District.
Ka jingshlei um ka la nang jur ruh ha Assam, ha kaba ka State Disaster Management Authority ka la ong ba jan 16 hajar ngut ki briew na kylleng ki 69 tylli ki shnong ha ka Dhemaji district ki la shah ktah, ha kaba ka jingshlei um ka la pynshlei ïa ki katto katne ki jaka lum khajna bad ka la pynthut ïa ka jingim kaba man ka sngi.
Ka India Meteorological Department, ka iathuh lypa ba kan don ka jinghap slap kaba jur ryngkat bad ka jingther pyrthat bad ka leilieh ha ki katto katne ki District jong ka Arunachal Pradesh, kiba kynthup ia ka East Siang, Leparada, Lower Siang, Lower Subansiri bad Papum Pare. Ki bor pyniaid ki la kyntu ia ki nongshong shnong ban kiar na ki jaka ba lah ban twa khyndew bad ban long kiba husiar, khamtam kito kiba sah hajan ki wah bad ki lum kiba lah ban shah ktah.
Da ka jingkheiñ lypa ïa u slap uba kham jur ha ki sngi ban wan, ka jingpyrkhat kaba mardor ka dang sah ha kaba pynphai biang ïa ka jingïadei jong ki surok, ban pynkhuid ïa ki lynti kiba la khang bad ban pynthikna ba ki jingïarap kin poi sha ki shnong kiba la shah ktah.
