Shillong, Jylliew 26 : U Myntri Rangbah ka Jylla Conrad K Sangma ha ka sngi Thohdieng ula ong ba ka thma pyrshah ia ka jingdih droks ka donkam ia ki kam kiba thikna, ym tang ka jingiakren, haba ai jingkren ha ka jingrakhe ia ka International Day Against Drug Abuse and Illicit Trafficking ha Shillong.
Ula kyntu ban bujli ia ka jingibein ikhoh ia ki nongdih droks da ka jingsngew synei bad sngewlem haba kyntu ia ki riew paidbah ba kin iadon bynta lang ha ka jingialeh pyrshah ia u droks.
“Kane ka sngi ka pyniatylli ia ka Sorkar, ki Shnong ki Thaw, ki Nonghikai, ki Balang ha kajuh ka mishon ban ratdyngkhong ia ka jingdih droks, pynkut ia ka jingkhaii ia u droks bad bujli ia ka jingibein ikhoh ia ki nongdih da ka jingisynei bad sngewlem” ong u Myntri Rangbah haba ai khublei ia ki kynhun bapher bapher kiba don bynta ha ka jingiakhun.
U Conrad ula ong ba DREAM, kaba sdang kum ka Mission, mynta kala kylla long ka jingiakhih jong u paidbah.
“Ki jingpyrshang ban iakhun pyrshah ia u droks kila don ha man ki kyrdan hynrei kam shym la don satia ka jingiatreilang bad ka DREAM Mission kala wanrah lang hajuh ia baroh kine ki kynhun, ki riew shimet bad ki seng” ula ong.
“Katba ngi wanrah ia baroh hajuh, ka long ruh kaba kongsan ym tang ban shu iakren hynrei ban leh da ka kam bad ban wanrah ia ki sienjam kiba thikna bad suki pa suki, ka Sorkar kan kyrshan ia ki riew shimet bapher bapher bad ki seng kiba iatrei na ka bynta kajuh ka mishon bad ka thong”.
Ula ban jur ba kane ka jingrakhe kam dei tang ka jingleh ba shisien shisnem. “Ngi don hangne ban snap ia phi bad ia ki jingai jingmut jong phi” ula ong.
“Ka long kaab kongsan ban pyniadon bynta ym tang ia ki kynhun bapher bapher hynrei ia ki riew paid bah ruh ha kane ka jingialeh pyrshah ia u droks. Katba kane kam pat urlong kan ym don ia kata ka jingktah kaba ngi kwah, kumta ngi hap ban pynjan sha ki riew paidbah”.
Ha kane ka jingrakhe, bala wan iashimbynta ruh da u Myntri kam Jngohkai Timothy D Shira, kala sdang da ka jingiashim kular bala ialam u Myntri Rangbah pyrshah ia ka jingdih droks.
U Conrad ula plie ruh ia ka Centre of Evolution ha Reid Provincial Chest Hospital ka ban iarap ia ki riew shimet ba dih droks lyngba ka jingkyrshan ha ka jingai jingsumar, jingiasyllok bad kiwei kiwei.
Ula sam ruh ia ki cheque sha ka Achik Welfare Society, Tura, The Bridge Society, Nongstoin, Khasi Presbyterian Assembly (Selda), Jowai, Dream Solace- Centre For Hope & Recovery, Shillong namar ki kam ba ki leh ha kaban pynsngewthuh paidbah pyrshah ia u droks, ka jingkyrshan bad jingsumar ia ki nongdih droks bad ban ai jingiarap ia ki ba kin wanphai pat sha ka imlang sahlang.
La ai ruh ia ka syrnot sha ki Recovery Champions, Community Champions bad ka Outreach & impact Award ha kane ka jingrakhe. La sam ruh ia ki nongjop jong ka jingiakop Best Drawing bad Drawing ba ioh bun eh ki like bad la pynlait paidbah ia ka Recovery Track Portal.
La iasoi ruh ia ka Memorandum of Understanding hapdeng ka Tnad Social Welfare, DREAM bad ka SEWA Inland, Tura.
Hadien ka jingialang plie, la ioh ruh ia ka jingkren halor ka phang Disrupting drug Trafficking & Organised Crime: Community Partnership For a Safer Society da u Aditya Goenka, Inspector General of Police (CID), Meghalaya, Shillong, Educate, Empower, Prevent: Schools as The First Line of Defence Against Drug Abuse And Organised Crime da u Banteilang J Kharshandy, Joint Secretary, Education Department & Director, School Education & Literacy, Meghalaya, Prevention, Early intervention And Treatment: Breaking The Cycle of Substance Use Disorders da u Dr Sandawiat D Lyngwa, Psychiatrist, MIMHANS, Shillong .
