Shillong, Jylliew 23: U Symbud Myntri Rangbah ka Jylla uba khmih ia ka tnad Transport Bah Sniawbhalang Dhar ha ka sngi Baar ula ong ba ka Sorkar Meghalaya ka dang don ha ka lynti ban pynbiang pura noh ia ka Vehicle Scrappage Policy 2025 da ka jingthmu ban pyntreikam noh hashwa ban kut une u snem.
U Bah Dhar ula ong, ba ki jingtip kiba bniah jong kane ka policy, kynthup ia katno tylli ki kali kiba dei ba shah pynduh noh ha une u snem, yn sa pynbna shisien ba la dep ban pynbit pynbiang ia katei ka rukom treikam.
“Ngi dang don ha ka lynti ban trei halor kane bad kan dang shim por. Shisien ba ngi lah pyndep ia kane ka kam ka jam, baroh kiei kiei yn sa pyntip sha phi, katno tylli ki kali bad kiba kumno ki jait kali kiban shah pynduh noh mynta u snem. Kumta mynta u snem ngi dang don ha ka lynti ban pynbiang pura noh” ong u Bah Dhar.
Ula kubur ba ka jingpynwandur ne ban pynbit pynbiang ia kane ka rukom treikam kan dei kaban dang shim por, hynrei ula pynpaw pat ia ka jingskhem jingmut ba dei ban pyntreikam naduh u snem 2026.
“Kan dang shim shuh ia ka por hynrei katkum ka jingsngewthuh ka jong nga, hapoh une u snem ngi lah dep ban pyntreikam noh ia kane” ula ong.
