Shillong, Jylliew 22 : Ka Sorkar kala pynmih ia ka jingbthah ia baroh ki nongshongshnong jong ki shnong kiba hap hapoh ka Pynursla C&RD Block, ba kin nym iaid lyngba, rung lane ialum paidbah ha ki jaka ba jia ka jinghap maw bad jingtwa khyndew.
Kat kum ka jingpynbna bala pynmih da Block Development Officer ka Pynursla Block Dr L Kharmon, la on gba kine ki jaka ki dang long kiba ma bad ki lah ban wanrah ia ki jingma kiba khraw ia ka jingim bad jingshngain jong ki paidbah.
Ki nongshong shnong ki dei ban:-
1. Kiar na kitei ki jaka ba don jingma bad bud ryntih ia ki jingbthah jong ki bor synshar.
2. Ym dei ban pynkhein ia ki dak ki jingmaham, ki jingiada lane ki jaka ba la khang paidbah.
3. Peitngor ba ki khynnah,ki tymmen bad ki jingri kim dei ban leit tur sha kitei
ki jaka ba la buh jingmaham.
4. Pyntip mar mar sha ki bor ba dei peit lada lap kino kino ki dak jong ka jingkhih khyndew, jinghap maw ne kiwei pat ki jingma.
5. Ban kiar ban iaid lyngba na ka surok Laitlyngkot-Lyngkyrdem bad ban iaid lyngba ka surok Pynursla-Dawki-Amlarem lane ka surok Pynursla-Nongjri-Sohra na ka bynta ka jingshngain.
Ia kane ka jingpynbna la pynmih na ka bynta ka jingshngain jong ki paidbah baroh. Ka jingitreilang ka jong ki paidbah ka long kaba donkam ban lait na kino kino ki jingjia ba sngewsih bad ban iada ia ka jingim jong baroh.
