Shillong, Jylliew 16: Ka Jaiñtia Students’ Union (JSU) ka la kyntu ïa ka Sorkar ban pynpra bad tei thymmai ïa ka District Library Auditorium kaba la jot rathai ha Jowai, da kaba ong ba ka jinglong jingman jong ka Auditorium mynta ka long ka ba ktah ïa ka pule puthi bad ka riti dustur ha West Jaiñtia Hills.
Ha ka Dorkhas ba la aiti sha u Myntri Arts & Culture Bah Sanbor Shullai, ka JSU ka la ong ba ka Auditorium kam long shuh kaba shngain bad ba lah ban pyndonkam.
Ka JSU kala ong ba mynta ka Auditorium ka la jot rathai bad wat ka tnum ruh ka long kaba la tlot, kaba buh jingma pynban iaki paidbah bad dei namar kane ka Auditorium kam shngain shuh ban pynlong ia ki jingialang ne ki prokram paidbah.
Ka JSU ka la kynthoh ba ki jingpynbha malu mala kam iarap shuh bad ka la dawa ban ithuh noh daka jaka ba thymmai bad ban tei thymmai iaka Auditorium khnang ba kan lah ban shakri ia ki samla pule bad ban pynneh pynsah ia ki pateng jong ka thain.
Kala tyrwa ruh ban ai kyrteng iaka Auditorium da ka Late Prof. Barrister Pakem, Vice-Chancellor barim ka NEHU.
Ka JSU ka la ong ba u Prof Pakem u dei u riew shemphang uba ki jingnoh synniang jong u sha ka pule puthi ki la kyntiew shibun iaka Jylla Meghalaya, khamtam ha Jaintia Hills, bad ka jingai kyrteng ia ka Library kan long ka burom ia ka pateng jong u bad kan ai mynsiem ia ki pateng ban wan.
Ka JSU ka la kyntu ïa ka jingmynjur kaba kham kloi haba iadei bad ka pisa naka liang ka Sorkar ban sdang pyntrei noh ïa ka jingtei.
