14 tylli ki Project la dep ban pyntrei, 32 tylli la jan dep artad, ong ka Sorkar
Shillong, Jylliew 16 : Ka Sorkar Meghalaya kala kyntait ia ka jingmih khubor ba kynnoh ba 17 tylli ki project ka DoNER ki dei kiba “sahkut hajuh bad pat pyniaid kam”, haba ong ba ka jingkam ka pynmih ia ka jingmut kaba bakla da kaba pyni ia kawei ka jingtip khlem ka jingpynshai kaba kham bniah jong ka kaiphod bala pynmih da ka Ministry.
Ha ka kyrwoh ba pynlait ha ka sngi Ba-ar, ka Sorkar Jylla kala kubur ba ka jingpyniaid ia ki kam ba dang long nod (0% zero progress) kala wan na ka snapshot ka kaiphod ka Ministry of DoNER jong u Jymmang 2026 hynrei ka ong ba ia kane ka kaiphod la pyni tang ia kawei ka bynta bad iehnoh ia ki jingbatai kiba bniah kiba don ha kane hi ka kaiphod. Ka jingmih ka long ka jingpynsngewthuh bakla ia u paidbah, kaba sngewsih jur bad ka bym long ka jingshisha”.
Ka Sorkar lyngba ka Commissioner & Secretary ka Planning, Investment Promotion, Sustainable Development Department, kala ai ia kane ka jingpynshai halor ka khubor kaba la pynmih ha kawei ka kot khubor phareng ka Jylla.
Kat kum ka jingong ka Sorkar, kane kajuh ka kaiphod ka DoNER ka pyni ba ka jingpyntrei ia ki project da ka Meghalaya ka long kaba iaid beit iaid ryntih.
Na ki 81 tylli ki kam ba la khmih bniah, kumba 57 % ki dei kiba la pyndep lane lah don ha ka bynta ba khatduh ban pyndep. 14 tylli ki project ba shongdor T.200.92 klur kila kot ia 100% ka jingpyndep, katba 32 tylli kiwei pat ki long hapdeng 75 bad 100% bala dep. Halor kane, ka kyrwoh ka ong, ka Jylla “ka don ha ka kyrdan ba hakhmat eh ha ka jingpyntreikam ia ki Project hapoh ka thain Shatei Lam Mihngi”, ka mat kaba la pynjah ha ka khubor.
Ka Sorkar kala pynshai ba ka “0%physical progress” ne ka jingpat sdang ia ka kam, bala pynmih ha ka kaiphod khmih bniah kam dei ka jingbishar ia ka jingbym lah pyntrei (failure) hynrei ka mut ba ki kam kim pat sdang kat haduh ka sngi ba pynmih ia ka kaiphod.
Kala ong ba kane ka ju long ka rukom haba iadei bad ki project ba la bei tyngka dang shen bad kiba dang iaid lyngba ka jingmynjur ia ka DPR, ka jingkhot tender bad ka jingaiti ia ka kam.
“Ban shu niew ia kine ki project kum kiba sahkut lane bym pat pyntrei, kam pyni sati aba kumno ka jingkhmih bniah ia ki project ka iaid” ong ka kyrwoh.
Na ki 17 tylli ki project bala buh ha ka thup 0%, 11 tylli ki dei kiba la khmih da ki Tnad Sorkar bad ki dang don mynta hapdeng ka jingkhot tender bad ia kiba la khmih lynti ban sa aiti ia ki work order hapdeng u bnai Jylliew bad Naitung 2026.
Ki hynriew tylli kiwei pat ki dei kiba la bei tyngka beit beit da ka DoNER sha ki central agency kum ka NESAC, NECTAR, IICA bad NPCCL, bad ka jingpyntreikam ka shong beit ha kine ki agency ym ha ka Sorkar Jylla.
Haba pynskhem ba ki jingbishar jong ki nongthoh khubor ki long kiba “pdiang sngewbha bad ba donkam”, ka Sorkar ka kyntu pat ba dei ban thoh ia baroh ki jingbatai ba bniah jong ka kaiphod khnang ba ki nongpule kin nym shah pynsngew thuh bakla tang na ka shi line jong ka kaiphod”.
Kala ban biang ba ka Sorkar Jylla kala kut jingmut ban pyndep ia ki project hapoh ka por kaba la buh bad ban bteng ha ka jingkhmih bniah ia baroh ki kam bala dep bei tyngka khnang ban weng ia ki jingeh kiba wit hakhmat.
