Guwahati, Jylliew 10: Saw ngut ki nongtrei phtok kynthup ia arngut ki Assistant Jailers bad uwei u Chief Warder, ki la shah kem ha kaba iadei bad ka jinglap ia ki mobile phone bad kiwei kiwei ki tiar ba la khang pyrshah na Sribhumi district jail, kaba pynpaw pyrthei ia kaei kaba ki nongtohkit ki ngeit ba ka dei ka network kaba la pynbeit ryntih kaba treikam napoh jong ka phatok.
Kitei kiba la shah kem ki dei ki Assistant Jailers u Rudra Deori bad u Biswajit Baruah, u Chief Warder u Mashir Ali Laskar bad uwei pat u nongap phatok.
Kane ka jingshah kem ka long hadien ka jingtohkit kaba la neh bun bnai halor ki jingkynnoh ba ki koidi ki pyndonkam ïa ki mobile phone hapoh phatok ban pynïaid ïa ki kam runar, kynthup ïa ki kam dawa pisa bad ki kam ba ïadei bad u drok.
Kane ka case ka la khring nyngkong eh hadien ba ki dur bad ki jingtip ba la kam ba ki pyni ia ki koidi kiba pyndonkam ia ki mobile phone hapoh ka phatok ki la paw ha ki social media, kaba la pynmih ia ki jingkylli kiba jur halor ka jingpahara bad jingpeitngor ia ka phatok.
Haba bud ryntih katkum ki jingtip ba la ïoh na ki tnad syntiat, ka kynhun ba kyrpang ba la ïalam da ka Sribhumi Senior Superintendent of Police ka Leena Doley, ka la pynlong ïa ka jingkhynra kaba kyndit ha ka por miet ha ka 2 tarik u Rymphang. Kane ka operation ka la lam sha ka jingioh ban kurup haduh 29 tylli ki mobile phone, ki tiar pynmynsaw bad shibun ki tiar kiba la khang pyrshah ban rah shapoh Jail.
Ka jingïoh kurup ka la pynlong ïa ka high-level probe ba kumno kum kine ki mar khaïi ki la rung sha kawei na ki jaka ba shngaiñ tam jong ka district.
Hadien kata ki nongtohkit ki la lap ïa ki sakhi kiba pyni ba ki katto katne ki nongtrei phatok ki la pynsuk ïa ka jingrung jong ki tiar ba la khang bad pynlah ïa ki kam be-aiñ ban bteng hapoh phatok.
Hadien ka jingtohkit kaba la bun bnai, ki pulit ki la kem ia kitei ki saw ngut ki heh, kiba la suba ba ki dei ki nongiashim bynta ba kongsan ha katei ka kam runar. Mynta ki bor pyniaid ki dang kylli jingkylli ia ki nongshah kynnoh ban tip ia ka jingheh jingrit ba pura jong katei ka network bad ban ithuh ia kino kino ki briew kiba donkti.
Ki jingshah kem ka la phah ia ka jingkyndit lyngba ki bor pyniaid phatok bad ka la pynlong ban bishar bniah ia ki jingpynbeit pahara hapoh katei ka jaka.
Ka jingtohkit ba bniah mynta ka dang iaid sha phrang.
