Shillong, Jylliew 08 : U Nongialam ka National People’s Party (NPP) James K Sangma, ha ka sngi Nyngkong, ula thep kyrteng kum u kyrtong ka kynhun synrop Meghalaya Democratic Alliance (MDA) sha ka elekshon Rajya Sabha na Meghalaya.
U James ula thep ia ki kot ki sla hakhmat u Returning Officer Malthus S. Sangma, Secretary ka Meghalaya Legislative Assembly.
La synran ia u James da u Myntri Rangbah ka Jylla bad National President ka NPP Conrad K Sangma, ki Myntri ka Sorkar MDA, ki MLA bad ki paralok ba iadonlang ha ka MDA.
Haba kren hadien ba dep thep kyrtemg, u James ula ai khublei ia u Myntri Rangbah, ki Symbud Myntri Rangbah Bah Prestone Tynsong bad Bah Sniawbhalang Dhar, ki MLA bad baroh ki paralok kiba kyrshan ia u kum u kyrtong.
U James ula ong ba lada u shah jied kum u MP ka Rajya Sabha, u don jingthmu ban long ka sur hapoh Rajya Sabha halor ki jingdawa kiba la sahteng la slem bha bad ki kam ki ban mih na ka bynta ka lawei ka Jylla.
U James ula pynpaw ia ka jingsngewnguh namar ka jingshah jied da kawei ka sur na ka sorkar MDA bad pynpaw ba u long uba la khreh ban shim ia kano kano ka jingkitkhlieh bala bynshet ha u.
Ha kajuh ka por, u Myntri Rangbah Conrad K Sangma ula ong ba lada u kyrtong ka NPP ua shah jied kum u MP ka Rajya Sabha, un sa rah iakren ia ki mat ba kongsan jong u paidbah ka Jylla bad iashim bynta shirthem ha ka jingthaw ain bad iatai hapoh Rajya Sabha.
“Ngi khmih pynti ba u MP yn long kum ka pyrnon hapdeng ka Sorkar Jylla bad ka Sorkar Pdeng halor ki kam bapher bapher kiba ka Jylla ka hap ban buddien. Nga sngewskhem ba un pyndep iala ka kam bala bynshet ha u” ong u Myntri Rangbah.
Ula pynpaw ruh ba lada u shah jied, une u MP ba thymmai un buddien halor ka jingdawa pyntreikam ia ka Inner Line Permit (ILP) bad kiwei ki mat kiba sahteng jong ka Jylla.
“Kum ka Sorkar bad kum ka party, ngi la pynthikna ba ia kine ki kam yn buddien tyngeh bha” ula ong.
U Myntri Rangbah ula ong ba u MP nun shim ia ka bynta kaba kongsan bha ha kaban pyn sngew ia ki mat kiba la shim da ka Sorkar, kynthup ka jingpynrung ia ka ktien khasi bad garo ha ka khyrnit ba phra, ki kam ba iadei bad ka sixth schedule, ka jingpynkylla ia ka FCRA, ka jingrung beain ki mynder ri, ka ILP, bad ka MRSSA.
Ka shuki MP Rajya Sabha kala lait thylli hadien ba kut ka samoi treikam jong u MP ba mynta Dr WR Kharlukhi.
Ka Election Commissioner kala pynbna ba kane ka elekshon Rajya Sabha na ka bynta ki 24 seat ha ki 10 tylli ki Jylla kan long ha ka 18 tarik Jylliew. Ka jingthep vote kan sdang naduh ka por 8 baje mynstep haduh 4 baje janmiet katba ka jing niew ia ki vote kan long ha ka por 5 baje janmiet.
Ka MDA-II, kaba kynthup ia ka NPP, UDP, BJP, HSPDP bad arngut ki MLA shimet, kala jied ia ka kyrteng u Vice President ka NPP James K Sangma ban leit mihkhmat sha Rajya Sabha.
 James K Sangma, ha ka sngi Nyngkong, ula thep kyrteng kum u kyrtong ka kynhun synrop Meghalaya Democratic Alliance (MDA) sha ka elekshon Rajya Sabha na Meghalaya.){kind=link}