Shillong Jylliew 03: Ka Khasi Students’ Union (KSU) lyngba ka Environment Cell, ha ka sngi Balang kala leit ban ai khublei bad ai mynsiem ia u Bah Hally War halor ka jingioh ia ka khusnam kaba heh tam ha ka ri-ka Padma Shri Award.
Ka KSU hapoh ka jingïalam u Assistant Environment Secretary samla Shelkitbok Kharbani ryngkat bad u General Secretary ka KSU South Khasi Hill District Unit samla Mesadap L Skhembill bad ki dkhot ka Sohra Circle kila hiar sha ka shnong Siej, Nongkhroh Sirdarship ban pynkup burom kyrpang ïa u bah Hally War halor ka jingioh ïa ka Padma Shri Award 2026 na ka Sorkar Pdeng, halor ka jinglah ka jongu ban tei ïa ki Jingkieng Jri (Living Root Bridge) ïa kaba la ai kyrteng da ka Umkar Living Root Bridge.
U Bah Hally ula pynpaw ba ula sdang ban tei ïa kane ka jingkieng naduh ba u dang don ha ka rta kaba 10 ne 11 snem eiei bad mynta ula don kumba 70 snem duna bad ula pynpaw ruh ba ka jingtei jongu ïa kane ka jingkieng kam dei eh ban khring ïa ki nongjngohkai pyrthei hynrei ula tei khnang ban suk ka leit ka wan haba leit bri leit lyngkha na ka bynta ki longdien, namar ba mynshwa ha kane ka jaka la shu pun jingkieng tang da ki siej bad ki dieng tylli.
Ula ong, ba um shym la poi pyrkhat ba kan kylla long pynban kawei na ki jaka jngohkai pyrthei, ïa kaba kam dei shuh tang ban pynsuk ka leit wan haba ba leit bri, hynrei kala ailad ban kamai jakpoh wat ïa ka shnong ka thaw khamtam haba la wan jngoh ïa kane ka jingkieng da ka Myntri ka Sorkar Pdeng, ki Myntri Sorkar jylla bad ki nongjngohkai ruh kila khambun bha kiba wan ban peit ia kane ka jingkieng.
U Bah Hally War ula pynkynmaw ruh ba kum ka jaidbynriew, ki samla kidei ban ieit, ban pynneh pynsah, ban bteng ruh ïa kaei kaba ki longshwa manshwa kila ai ne pynkhamti bad ula pynkynmaw ruh ïa ki samla jong ka jaidbynriew haba ki leh ïa kano kano ka kam la kadei kaba rit ne kaba khraw dei ban leh da ka jingieit, jingminot bad jingaiti lut bad shisien ka sngi kin sa ïoh kheit ïa u soh jong ka jingjop.
 lyngba ka Environment Cell, ha ka sngi Balang kala leit ban ai khublei bad ai mynsiem ia u Bah Hally War halor ka jingioh ia ka khusnam kaba heh tam ha ka ri-ka Padma Shri Award.){kind=link}