Phah tuklar ki Contractor ka ri-lum Khasi Jaintia ha u CM ba sahteng ki bill ka JJM

Shillong, Jylliew 2: Ka Khasi Jaintia Government Contractors & Supplier Association (KJGCSA) kala aiti ia ka dorkhas ha u Myntri Rangbah ka Jylla u Conrad K Sangma, ban kyrpad ban tuklar mardor halor ki jingeh kaba mad da ki Government Contractors and Suppliers ha ka jylla.

Ha ka dorkhas, ka Association kala ong, ba ki kontraktor jongka Khasi Jaintia kila shah pynduh ia ki kabu ban iashimbynta bad ban ioh jingmyntoi na ki projek sorkar hapoh jong ka jylla.

Kala bynrap ruh “Ia ki mat kiba iadei bad ka jingbym biang ka rukom siew ne pyllait ia ki Bil” kaba la ktah ia ki dkhot ka longiing longsem bad ruh ka jingbym lah ban trei ia ki kam ki jam.

Ka Association kala pynpaw halor ki 4 tylli ki mat jingdawa kiba kongsan. Halor ka Jal Jeevan Mission, kala kyntu ia ka sorkar ba kan shimkhia halor ka jingsahteng ban siew ia ka pisa bad ka bynrap “Namar ba ia ka Bill jong ka JJM kadei kaba ym pat siew pynkhuid, bun ki kontraktor kila mad ia ka jingeh ha kaba iadei bad ka pisa pilain”.

Ha ka dorkhas la kyrpad ruh ia ka jingtuklar ban bthah ia ka tnad PHE ba kan siew pyndep noh ia kumba 50 percent jong ka pisa lyngba kiwei pat ki tyllong. Kala kyrpad ruh ban pynkloi noh ha kaban pyllait ia ka pisa ne ki Bill kiba dang sahteng jong ki skhim ka Sorkar Pdeng hapoh jong ka tnad Water Resources na ka bynta u snem 2024-2025.”

Ha kaba iadei bad ka PWD Roads, ka Association kala ong, ba ka rukom leh ha kaban khot ia ki Tender ha ki Packages khlem da phiah ia ki kam kala ai jingmyntoi tang ia ki katto katne ngut ki heh kontraktor, da kaba pynduh lad noh ia ki kontraktor jong ka jylla.

Kala kyntu ia ka sorkar “Ba kadei ban phiah noh ia ki Tender ban ailad ia ki kontraktor ka jylla ban ioh iashimbynta bad ban kyntiew ia ka kamai kajih bad ia ka jingdon ia ka kyrdan ia ka kam kaba pyntrei”.

Nalor kane, ka Association kala kyrpad ba dei ban pynkut noh ia kano kano ka rukom leh ka bym long ha ka lynti kaba khuid bad ka bym shai kdar.

“Ki tnad sorkar kidei ban pynthikna ia ka jingkhuid bad ka jingshai kdar ka rukom treikam ka jongki lyngba ka jingkhot ia ka tender. Kane kan kyntiew ia ka jingiashimbynta kaban long ha ka lynti ka bym ia shah liang, ka jingdon ia ka kyrdan ha ka jingtrei ia ka kam bad ka jingpynlut ia ka pisa ha ka rukom kaba biang bha” la ong ha ka dorkhas.

Kala kyrpad ba dei “Ban pynsangeh ia ki Close Tender bad ka jingbthah ban trei lypa ia ki kam ha kaba iadei bad ka PWD Roads khlem ka jingpynmih ia ka hukum bala bhah ia ka kam” bad kala kyrpad ba dei ruh ban pynsangeh noh ia ki kam jong ka tnad Soil & Water Conservation, Wildlife bad Forest.

“Dei ban khot Tender ia ki kam ban ailad ia ki kontraktor ka jylla ba kin ioh iashimbynta” ka la ong.

Kala ai ruh ka jingiaroh ia ka sorkar ha ka jingpyrshang ban theh ia ki kam pynroi bad ka Association kala ong, “Ngi kyrpad ia phi ba phin tuklar lem ban pynthikna ba ki kontraktor kiba na ka jylla kim dei ban duh noh ia ki lad ban kamai jakpoh bad ia ka bhah kaba dei hok ha kaba iadei bad ki jingiaid jiong ki kam pynroi”.