Shillong, Jymmang 30: U Myntri ka Sorkar Pdeng uba khmih ia ka Labour & Employment and Youth Affairs & Sports u Dr Mansukh Mandaviya hynne ka sngi Saitjain ula leit iakynduh ia u Lat ka Jylla u CH Vijayashankar ha Lok Bhavan, ha kaba kila iakren sani ban pynleit jingmut ha ka kam jngohkai pyrthei, ka jingiar jong ki jait jingim ki bapher bapher, ka jingpynkup bor ia ki samla bad ka roi ka par kaba iaineh.
Ha kane ka jingialang la iadonlang ruh u Additional Chief Secretary sha u Lat ka Jylla u HC Chaudhary.
Ha kane ka jingiakren hapdeng u Lat bad u Myntri ka Sorkar Pdeng kila iatai sani “Halor ka jinglah ka jylla kum kata ka jaka kaba biang bha ha ka kam jngohkai pyrthei bad ka banjur ia ka jingdonkam ban kyntiew ia ka Meghalaya kaba don ia ka jingitynnad jong ki sawdong sawkun ki jongka, ka jingriewspah ka kolshor barim bajah bad ki lad kiba iadei bad ka eco-tourism”.
Ka jingialang kala phaikhmat ruh halor ka jingdon ka Meghalaya ia ki jingthaw bad ia ki jait jingim kiba long kyrpang bad ka jingiar ha kaba lah ban leh ia ki jingwad bniah, ban pynneh pynsah bad ban pyndonkam ia ka spah bah jong ka jingdon ia ki kynbat kiba lah ban ai jingsumar.
Kine baroh ar ngut ki heh sorkar kila pynpaw, “Ia ka jingkongsan ban pynsah iaka jinglong jingman bad ia ka sawdong sawkun ha ryngkat bad ka thaw ia ki lad ki lynti ban kamai kajih bad ban kyntiew ia ka ioh ka kot lyngba ka jingstad saïan bad ki jingleh kiban pynneh pynsah”.
U Dr Mandaviya bad u Lat ka Jylla u Vijayashankar kila ia sam mar kylliang ia ki jingpynpaw bad ki jingpynsngew ki jongki ha kaba iadei bad ka jingpynkup bor ia ki samla, ka jingkyntiew ia ki sap ki phong, ban kyntiew ia ka kam ialehkai, ban thaw ia ki lad ban aikam aijam bad ia ki sienjam kiba thmu ban wanrah ia ka jingroi kaba salonsar bad ban pynbha ia ka rukom im jong ki paitbah ka jylla Meghalaya”.
Ka jingialang kala pynpaw ruh ia ka jingdonkam ban ia donlang ia ka jingkitkhlieh na ka bynta ban pynkhlain ia ka jingiatreilang hapdeng ka Sorkar Pdeng bad ka Sorkar Meghalaya ha kaban pynurlong ia ka jingiohi jngai jong ka roi ka par kaba iaineh, ka jingkiew ka ioh ka kot bad ka jingkyntiew ha kaban plie ia ki lad na ka bynta ki samla.
U Lat ula pynpaw ia ka jingsngewnguh ia u Myntri ka Sorkar Pdeng halor ka jingbteng ban ai jingkyrshan na ka bynta ban kyntiew ia ka roi ka par ka jylla Meghalaya bad ula kitbok ia u Dr. Mandaviya ba un seisoh ha ki jingpyrshang ki jongu ban kyntiew ia ka bha ka miat jong ki samla ha ka ri.
