Shillong, Jymmang 30 : U Myntri ka Ministry of Youth Affairs & Sports Dr Mansukh Mandaviya bad u Myntri Rangbah ka Jylla Conrad K Sangma ha ka sngi Saitjain, kila plie ia ka Integrated Multipurpose Indoor Hall ha JN Sports Complex bad pyniaid ia ka jingialang ban iasoi ia ka soskular ban pynlong ka Jylla ia ka 39th National Games, Meghalaya 2027.
Ia kane ka jingiasoi soskular la pynlong ha ka jingiadon lang ka Myntri Khynnah ka Youth Affairs & Sports Raksha Nikhil Khadse, u Myntri kam ialehkai ka Jylla Wailadmiki Shylla bad ka President ka Indian Olympic Association Dr PT Usha.
Ki Heh jong ka IOA, ki nongkitkam ka Meghalaya State Olympic Association bad ki nongmihkhmat na ki State Olympic Association jong ki Jylla ka thain Shatei Lam MIhngi, kila iadonlang.
Haba pdiang ia ki kynrem ki lyndan, u Bah Wailad ula niew ia kane ka sngi kum ka “khyllipmat kaba sngew sarong ia ki paidbah ka Jylla Meghalaya bad ki kynhun ba khmih ia ki kam ialehkai jong ka thain Shatei Lam Mihngi”.
Kane ka Indoor Hall ka dei kaba la tei ha ka jinglut ba T.132.9 klur bad la bei tyngka da ka New Development Bank hapoh ka Meghalaya Ecotourism Infrastructure Development Project. Ka dei ruh kawei na ki jaka ialehkai Indoor kiba biang tam hapoh ka Jylla, kaba la pyndep hapoh 2.5 snem
Kane ka hall ka long kaba la khreh ban pynlong ia ki jingialehkai Basketball bad Kabaddi ha ka 39th National Games 2027.
Hadien ka Lympung, kan dei ka jaka ban pynlong ia ka High-Performance Ports Science Centre kaba don ia ki “biomechanics, ki dawai dashin, ka physiotherapy, ka jaka bam bad ka sports psychology”.
Kane ka Indoor Hall ka dei shibynta ban pynbun ia ki jingtei ia ki jaka ialehkai ba kynthup ia ka Umsawli Sports Complex, ka PA Sangma Sports Complex ha Tura bad ka Mawkhanu Football Stadium ban sa mih, kaba la buh ba kan long ka madan ialehkai phutbol kaba heh duh hapoh ka thain Shatei Lam Mihngi
Ha kane kajuh ka jingialang, ka Sorkar Jylla bad ka Indian Olympic Association kila iasoi ia ka soskular ka Jylla ban pynlong ia ka 39th National Games ne ka Host State Agreement. Kane ka soskular ba thymmai kan pynkhlain ia ka jingiatehlok hapdeng ka JYlla bad ka IOA da kaba batai shai ia ki ain, ki pisa pilain bad ka jingkitkhlieh haba pyniaid ia ka lympung da baroh arliang.
Palat 10000 ngut ki nongialehkai la khmih lynti ba kin wan ialehkai ha ki lai tylli ki sor ki ban pynlong ia kane ka lympung-ka Shillong, Tura bad Jowai, ha kaba kane ka lympung ialehkai la khein antad ba kan plie ia ka lad iohkam ia palat 5400 ngut ki nongshongshnong ka Jylla.
Haba kren ha ka jingialang, u Dr Mansukh ula iaroh ia ka Jylla halor ka “jingpyrshang kaba radbah bad ka jingpynkhreh ban pynlong ia ka 39th National Games” haba pynpaw ba ka Meghalaya “kala pyni ia ka jinglah ba kynsai jong ka ha kaban pyntrei ia ki project hapoh ka por kaba dei bad ha ka rukom kaba biang eh”.
Ula ong ba ka Mawkhanu Football Stadium ban wan kan dei ka mada ialehkai kaba paka eh jong ka Jylla ka ban lah pynlong ia ki jingialehkai National bad International, haba bynrap “kum kine ki jingtei kin iarap bha ban kyntiew ia ki kam jngohkai bad plie lad ia ka ioh kam iohjam ha ka thain”.
U Myntri Rangbah ka Jylla Conrad K Sangma ula pynskhem ia ka jingkut jingmut jong ka Jylla ban “pynlong ialade kum ka jaka pdeng ba hakhmat eh ha ki kam ialehkai hapoh ka ri India”.
Ula ong ba ki jingtrei ia ki jingtei ba iahap kyrdan bad ki ri ka pyrtheibad ka jinglah ban pynlong ia ki jingialehkai National bad International, kan pynkylla dur ia ka rukom pyniaid ia ki jingialehkai ha Jylla bad kan pynkha ia ki lad ba thymmai na ka bynta ki samla”.
“Ka jingpynlong ia ka 39th National Games ka dei tang ka jingsdang jong ka thong kab jngai ban tei ia ka kolshor ialehkai kaba khlain bad ba neh shirta ha Meghalaya” ong u Conrad haba kyntu ia ki samla nongialehkai “ ban shim ia kane ka kabu ban sah khana bad ban mih iakhun hala ka jong ka jaka bad wanrah burom ia ka Jylla”.
