Dei ka jingbym biang ka pule puthi ba ioh pateng ka daw ba hiar ka PGI : Metbah

Ki jingpynkylla ka Sorkar kan shim por ban pyni soh

Shillong, Jymmang 29 : U Myntri Sorkar bad President ka UDP Bah Metbah Lyngdoh ha ka sngi Thohdieng ula ong ba ka jingioh kyrdan ba sha trai ka Meghalaya ha ka Performance Grading Index (PGI) ka dei namar ka jingbym biang ka rukom pyniaid ia ka pule puthi na ki skul kaba la hiar pateng.

Hynrei ula ong ba ki jingpynbeit bad jingpynkylla jong ka Sorkar kila sdang ban pyni ia u soh.

“Ka PGI ka wanrah ia ka jingsngewkhia kaba jur bad kane kala iaid mynta la bun snem” ong u Bah Metbah haba jubab ia ka jingkylli halor ka jingioh kyrdan PGI ka Jylla.

“Hynrei ki don bun ki sienjam bala shim da ka Sorkar, bad ngi la sdang ban iohi ia u soh ka jingtrei kam” ula ong haba bynrap ba kane ka jingeh ka Jylla ka dei kaba la hiar pateng khamtam ka jing bun jait ki rukom pyniaid ia ki skul.

“Kane ka dei ka jingeh kaba ngi la ioh pateng la bun bun snem mynta” ula ong.

“Ki don bun jait ki 10-15-20 jait ki skul ha ka Jylla. Balei kumta? Namar shibun kiei kiei kiba la klet ha ka por ba ki Sorkar ki shim ia ka sienjam ban seng ia ki skul thymmai hapoh ka Jylla”.

U Bah Metbah ula pynpaw ba ka jingrit ka tulop ki nonghikai kum ka jingeh ban ai ia ka jinghikai kaba bha. “Wat haduh u bnai bala lah, phi lah iohi katto katne ki nonghikai kiba ioh ia ka tulop ba T.10,000, T.20,000, T.30,000 bad T.40,000” ula ong.

Ula kubur ba ki jingpynkylla kin ym wanrah ia u soh ka jingkylla ha ka shimiet. “Ka Sorkar kala shim ia bun ki sienjam haba iadei bad kane ka jingeh hynrei ka dei ka ban dang sei ia u soh” ong u bah Metbah.