Wan ka PT Usha sha Shillong ban khmih bniah ia jingpynkhreh ka Jylla ia ka National Games

Shillong, Jymmang 29: Ka Meghalaya State Olympic Association (MSOA) haka sngi thohdieng ka la pdiang sngewbha ïa ka President ka Indian Olympic Association (IOA) Dr PT Usha ha ka jingwan iuhkkat ba nyngkong jong ka sha Shillong ban ïakren halor ka jingpynroi ïa ki jaka ialehkai, ban pyntbit iaki nongïalehkai nalor ka jingpynkhreh iaka 39th National Games Meghalaya 2027.

Ka Dr Usha ka la poi ha Shillong Marriott Hotel, ha kaba la pdiang burom ia ka da ki nongkitkam jong ka MSOA naduh u Working President u Bah John F Kharshiing, uba dei ruh u President ka Shooting Association of Meghalaya, u Bah EMH Passah, Senior Vice President ka Meghalaya Athletics Association bad dkhot ka MSOA, Kong Matsiewdor War Nongbri, MSOA Vice President bad Chief Adviser jong ka Archery Association of Meghalaya, Bah Pynbiang Laloo u President ka Meghalaya Badminton Association uba dei ruh u Joint Secretary ka MSOA, bad u Bah Ksan Kupar Warjri u General Secretary ka All Meghalaya Karate Association uba dei ruh u Treasurer ka MSOA.

Ha kane ka sngi la don ruh u Capt Ajay Narang uba long u Executive Assistant jong President jong ka Indian Olympic Association.

Katkum ka jingïathuh jong ka MSOA, ki nongïalam ki la pynpaw ïa ka jingsngewnguh ïa ka Dr Usha kaba la bteng ban ai mynsiem bad ïalam lynti ban pynkhlaiñ ïa ka jingïaid lynti jong ka Association bad ka kam ialehkai ha Meghalaya bad ka thaiñ shatei lam mih ngi jong ka Ri India.

“Haka jingïakren la pynleit jingmut ha ka jingthmu ban pynroi ïa ki sap ki nongïalehkai, ka jingpynbha ïa ki jingtei, bad ka jingpynlong kaba jop ïa ka 39th National Games Meghalaya 2027” ong ka MSOA ha ka kyrwoh.

Ka Association ka pynpaw biang ïa ka jingkular jong ka ban ïatreilang bad ka Indian Olympic Association, ka Sorkar Meghalaya, bad baroh ki nongïashim bynta ban pynthikna ba ka Meghalaya kan paw kum ka jaka ïalehkai ba hakhmat hapoh ka ri.