Shillong, Jymmang 29 : Ka Meghalaya kan jied ia u MP ka Rajya Sabha ha ka 18 tarik Jylliew bad ka jingniew vote kan long hi ha kane ka juh ka janmiet, pynbna u Chief Electoral Office Dr BDR Tiwari ha ka sngi Thohdieng hadien ka jingbatai ia ki seng sain pyrthei ia ka rukom pyniaid ia ka elekshon ba shisien ha ka arsnem.
Kane ka elekshon ka dei kaba la pynlong ban pyndap iaki shuki kiban lait thylli ha ka 21 tarik Jylliew.
“Ngi la iashong jingialang bad ki seng sain pyrthei haba iadeibad ka jingpynlong ia ka elekshon Rajya Sabha ba shisien ha ka arsnem hapoh ka Jylla Meghalaya, namar ka samoi treikam u MP Rajya Sabha kala dei ban kut noh hapoh ka 21 tarik Jylliew. Kumta, donkam ban pynlong ia ka elekshon la kumno kumno ruh hapoh ka 20 tarik Jylliew” ong u Dr.Tiwari haba iakren bad ki nongthoh khubor.
Haba pyntip ia ka por bala buh da ka Election Commission of India, ula ong ba ia ka jingpynbna yn sa pynmih ha ka 1 tarik Jylliew.
“Ka sngi ba khatduh ban thep kyrteng ka dei 8 tarik Jylliew, ka jingbishar kyrteng kan long ha ka 9 tarik Jylliew bad ka sngi ba khayduh ban weng ia ka jinglong kyrtong ka dei 11 tarik Jylliew, 2026” ula ong.
“Ka sngi ban thep vote kan long ha ka 18 tarik Jylliew naduh ka por 9 baje mynstep haduh 4 baje janmiet. Ka jingniew ia ki vote kan long ha kajuh ka sngi ha ka por 5baje janmiet bad ia kine ki kam dei ban pyndep hapoh ka 20 tarik Jylliew, 2026” ong u Dr Tiwari.
Ki bor pyniaid Eleskhon kila leit ban khmih bniah ia ka jaka pynlong ia ka elekshon hapoh ka Iingdorbar Thaw Ain ka Jylla ha ka step sngi Nyngkong.
“Ngi la leit jurip ia ka jaka ha ryngkat ki Ophisar na ka Meghalaya Legislative Assembly bad ngi la shem ba baroh ki long kiba ihun kat kum ki kyndon, ka por bad ki jingpynbiang ia ki jingdonkam kumba la bthah da ka ECI” ula ong.
U CEO ula batai bniah ia ki kot ki sla ba hap pynbiang da ki kyrtong. “Ngi la batai ia baroh kiei kiei sha ki seng sain pyrthei haba iadei bad ka jingthep kyrteng kynthup ka jingaiti ia ka Form2C, affidavit ha ka Form 26, Security Deposit, Form A bad Form B lada dei u kyrtong ka seng sain pyrthei kynthup ka kyndonn ba iadei bad ka For C1 haduh C 8” ula ong.
Ula batai ia ka jingdonkam ba ki kyrtong bad seng sain pyrthei ki hap ai beit ia ki jingtip lada don ki kam bymman ba kila shah pynngat teng kat kum ka jingbthah ka Iingkashari Supreme Court bad jingthah bala pynmih da ka ECI.
Haba batai ia ka rukom thep vote, u Dr Tiwari ula ong “Ka rukom pyniaid ia ka elekshon kan long da ka open ballot hapoh ka Representation of People Act 1951 ia kaba la dep ruh ban batai sha ki seng sain pyrthei”.
Ula pyntip ba ia ki notice jong ka jingialang la dep ban phah lut sha baroh ki seng sain pyrthei hynrei ki don katto katne ki bym shim la wan iashimbynta.
“Ngi la pyrshang ban iakren bad ki lyngba ka phone hynrei namar ba ki don ki kam shawei, kim shym la lah ban wan iashimbynta” ula ong.
Halor ka elekshon Lok Sabha, u CEO ula ong “Ka elekshon kan sa long hadien ba ka ECI kala pynbna ia ka tarik.
Ula pynthikna ruh ia ka jinglong bala khreh ban leh ia ka Special Intensive Revisson jong ka electoral roll. “Ki nongtrei elekshon ki long kiba la khreh beit. Namar la dep pynbna ia ka tarik jong ka SIR na ka bynta ka Jylla Meghalaya, ngi la long kiba la pynkhreh ban leh ia ka SIR hapoh ka Jylla” ong u Dr Tiwari.
