Sngewkhia ka HYC ba kiew dor ka Petrol, Diesel bad LPG

Shillong Jymmang 24: Ka Hynñiewtrep Youths’ Council (HYC) kala pynpaw ïa ka jingsngewkhia kaba jur halor ka jingiai bteng ka jingkiew dor ka umphniang petrol, diesel bad ka tyndong lyer shet jingshet ne LPG, kaba la buh ha ka jingeh kaba khraw ia ki paidbah ka jylla Meghalaya.

U President ka HYC u bah Roy Kupar Synrem ula ong, “Kane ka jingkiew dor jong kine ki mar kiba donkam kala ktah jur ïa baroh ki bynta jong ka imlang sahlang, khamtam ïa ki nongbylla sngi, ki nongrep, ki trai khyndiat ki kam khaii, ki nongniah kali paidbah, ki samla pule bad ki longïing kiba duna ka jingïoh jingïarap pisa”.

Nalor kane ula ong, ba ka jingkiew dor jong ka umphniang kala wanrah ïa ka jingkiew jong ka bai kit bai bah bad kala pynkiew ruh ïa ka dor jong ki mar ba donkam bad ki jingshakri bapher bapher, kaba la pynjynjar shuh shuh ïa ka jingim kaba man ka sngi jong ki paidbah. Ka jingkiew dor jong ka LPG kala kylla long ka jingeh kaba khraw ïa ki longïing kiba la mad lypa ïa ka jingkhia ha ka ïoh ka kot bad ka jingkiew dor jong ki mar.

Ka HYC ka ngeit skhem ba ka Sorkar kam lah ban shu peitkai katba ki paidbah ki dang mad ïa kine ki jingeh. Ka umphniang bad ka LPG kidei ki jingdonkam ba kongsan jong ka jingim ym ki mar pynkmen ne mar kyrpang, bad kadei ka kamram jong ka Sorkar ban pynthikna ba ki nongshong shnong kin ym shah pynngat ha ka jingkhia pisa kaba palat.

“Ngi kyntu ïa ka Sorkar Meghalaya ba kan tuklar mardor da kaba bishar biang ïa ki khajna bad ki jingïoh lum pisa jong ka jylla halor ka umphniang, ban wad ïa ki lad jingïarap kyrpang bad jingïarap pisa na ka bynta ka Meghalaya bad ban shim ïa ki sienjam kiba skhem ban pynduna ïa ka jingkhia jong ki paidbah. Ka Sorkar ka dei ruh ban ïatreilang bad ki bor kiba dei khmih khnang ban pynthikna ba ka bha ka miat bad ka jingïada ïa ka jingmyntoi jong ki paidbah kan neh” la ong u Bah Roy Kupar.

Ka HYC kala maham ba ka jingbitar bad jingbymhun jong ki paidbah ka dang nang kiew bad ka kyntu ïa ka Sorkar ba kan leh eiei khlem jingïai pynslem shuwa ba ka jinglong jingman kan nang sniew shuh shuh.
Ka Council ka ieng skhem bad ki paidbah bad ka pynskhem biang ba ka synshar paidbah ka dei ban buh hakhmat eh ïa ka bha ka miat bad ka jingdonkam jong ki nongshong shnong.