Shillong, Jymmang 20: Ki pulit East Garo Hills ki la kem ia uwei u briew halor ka jingkynnoh ba u la buh ia ki jingthoh bad Video khlem akor kaba pynlong sohpdung ia ki kynthei ha ki rynsan Social Media.
Utei u nongshah kynnoh, Newbard M Sangma ba khot sin u Betuel na A•chak Jangkigre, Williamnagar, u la shah kem hadien ba ki bor ka ain ki la lap ba u pynïaid ïa kawei ka Facebook Account ha kaba u la thep (Upload) ïa ki jingthoh bad ki Video ba khlem akor bad kiba kren beiñ ïa ki kynthei da ki ktien kiba sniew.
Ki pulit ka Williamnagar ki la Register Case pyrshah ia u nongshah kynnoh hapoh ki kyndon ba kynthup Sections 75(IV)(3) bad 79 jong ka Bharatiya Nyaya Sanhita (BNS), pule lang Section 67 jong ka Information Technology Act, 2000.
U Superintendent of Police u SA Rynjah u la ong ba ka jingtohkit ka la sdang hadien ba ki pulit ki la ïoh jingtip halor ka jingtreikam u nongshah kynnoh hapoh ka Face Book.
“Ïa ka jingtohkit la sdang hadien ba ki bor pynïaid ki la ïoh jingtip ba u ju mlien ban buh (Upload) ïa ki jingthoh bad ki Video kiba khlem akor ka Facebook account bad ka YouTube channel jong u, kiba lah ban ïohi da ki paidbah” u la ong.
Ki pulit ki la iathuh ba la bishar bniah ia ki jingthoh bad ki Video bad la lap ba ki long kiba pynkhein ia ka ain. “Ki jingthoh bad Video ha Facebook ba dang shen la lap ba ki long kiba sniew bad kiba khlem akor bad kiba lah ban shah pynshitom hapoh ki kyndon Sections 75(IV)(3) bad 79 BNS bad R/W Section 67 jong ka IT Act, 2000.”
Ha ka jingai jingmut shaki paidbah, ki pulit ka East Garo Hills ki la kdew ba “hapoh ka aiñ Information Technology Act, ka jingpynrung, jingpynpoi, ne jingpynmih ïa ki jingthoh ne Video khlem akor ka dei ka kam runar”.
U SP u la kyntu ia kiba shah ktah ba kin wan shakhmat. “Ki briew kiba shah ktah ki lah ban ujor ïa kum kine ki kam sha ki Pulit. Lah ruh ban pyndonkam ïa ka National Cybercrime Reporting Portal (NCRP) ban ujor namar ba ka long kum ka rynsan ba thikna na ka bynta ban ujor da kaba shngaiñ ïa ki jingjia ba sniew kiba jia haka rynsan Social Media kum ki kam haba iadei bad child sexual abuse material (CSAM) bad cyber-blackmail.”
