Shillong, Jymmang 20 : U Myntri ka Tnad PHE Marcuise N Marak ha ka sngi Balang ula ong ba ka jingpynslem jong ki Autonomous District Council (ADC) ban aiti ia ki Utilization Certificate (UC) jong ka pisa hapoh ka 15th Finance Commission ka dei ka daw ba sahkut ka jingsiew ia ki bill ka Jal Jeevan Mission (JJM) ha Meghalaya.
Haba kdew ia ka jingialang bishar kam ba dang shen bad u Myntri Rangbah Conrad K Sangma ha Taraghar State Guest House, u Marak ula pynshai ba ka jingslem kam dei namar ka Sorkar Jylla lane ka tnad PHE.
“Mynta, ngim shym la lah ban siew ia ki bill JJM haduh mynta bad kane kam dei namar ka Sorkar Meghalaya lane namar ka tnad PHE, ka dei na ka Sorkar India” ong u Marak.
Ki don bun ki kyndon ba ka Sorkar India kala ai. Kumta, ka tnad PHE ka Sorkar Meghalaya mynta kala leh lut bad pyndep ia baroh ki kyndon”.
U Myntri u iathuh ba ka Jylla kala jan lah ban pyndep pynbiang lut ia baroh ki jingdonkam bala buh da ka Jal Shakti Ministry.
Ula kdew ba ka jingslem ban aiti ki ADC ia ki UC ka dei kawei na ki kyndon kaba la buh jingeh. ‘Ka daw ka long ba hapoh ka Tied Fund jong ka 15th Finance Commission, ka Sorkar India kala ai pisa ia ki lai tylli ki District Council. Nga tharai kumba T.45 klur la ai ha u snem 2021-22”.
“Mynta, ka Sorkar India kala pan ia ka UC na ki. Katto katne na ki District Council kim pat pyndep ia ki UC haba iadei bad ka jingpyndonkam ia kane ka pisa” ula ong.
U Marak ula iathuh ba u Myntri Rangbah ula tuklar ban pynbeit ia kane ka jingeh. “Kumta, ngi dang ap bad ngi la pyntip ruh sha u Myntri Rangbah halor kane ka bynta bad ula bthah ia u Chief Secretary bad Additional Chief Secretary ba kin lum ia ka jingialang bad ki District Council khnang ba kin lah aiti noh ia ki UC bad hadien ngin sa lah ban kami a ki jingsiew jong ka JJM na ka Sorkar India”.
 ban aiti ia ki Utilization Certificate (UC) jong ka pisa hapoh ka 15th Finance Commission ka dei ka daw ba sahkut ka jingsiew ia ki bill ka Jal Jeevan Mission (JJM) ha Meghalaya.){kind=link}