Manipur | Ki jingumsnam kin buh ha ka jingeh ba khraw ia ka ECI ban leh ia ka SIR

Guwahati, Jymmang 18: Ka jingthmu jong ka Election Commission ka ri India ban pyntrei kam ïa ka Special Intensive Revision (SIR) jong ka electoral roll ha ki katto katne ki jaka jong ka Manipur kan ïakynduh ïa ki jingeh kiba khraw namar ki kam thombor, kam iaumsnam kaba mih na ki jingïakynad kiba thymmai kiba dang dang ïai bteng ban pynthut ïa ka jingim kaba man ka sngi.

Kane kan long ha ki 16 tylli ki jylla bad ha ki lai tylli ki Union Territory, ba kynthup ïa ki hynniew tylli na ki 8 tylli ki jylla ka thaiñ shatei lammihngi — ka Mizoram, Sikkim, Manipur, Arunachal Pradesh, Meghalaya, Nagaland bad Tripura.

Kum shi bynta jong ka jingpyntrei kam ha baroh kawei ka ri kaba thmu ban pynbha ïa ka jinglong kaba thikna, kaba kynthup lang bad kaba shai jong ki thup nongthep vote, ka kynhun thep vote ha ka sngi Paalei ka la pyntreikam ïa ka jingleh SIR ha kylleng kine ki jylla bad ki jaka jong ka Union Territories.

Katkum ki heh ka tnad election, la ong ba ia ka thup kyrteng thep vote ba khatduh yn sa pynmih ha ka 6 tarik u Nailur, 2026, ha Mizoram, Sikkim bad Manipur; 22 u Nailur ha Arunachal Pradesh; 7 tarik u Risaw ha Meghalaya bad 22 Naiwieng ha Nagaland; bad ha ka 23 tarik u Naiwieng, 2026, ha Tripura.

Hynrei ki heh sorkar ha Manipur ki la kam ba ban pynlong ia katei ka mat hapdeng ka jingkulmar kaba dang iai bteng kan long kaba eh haduh katta katta.

“Ban pyntrei kam ïa ka SIR ha ka jylla kan long kaba eh bha. Ki kam thombor, ki pakhang shnong, ki pakhang surok, ki rally bad ki pakhang shnong ki la kylla long ki kam kiba la jan man ka sngi.Ha kum kane ka jinglong jingman, kumno ngin lah ban pynïaid beit ïa kane ka jingthmu?” la ong u heh ophisar.

Katba ki heh sorkar ha kiwei pat ki jylla jong ka thaiñ shatei lammihngi, ki la ong ba ki la pynkhreh ban pynlong ïa ka jingpynkylla ha ka rukom kaba shai bad kaba ïa shim bynta lang.