Nongstoiñ, Jymmang 15: Ka Meghalaya State Skill Development Society, Eastern West Khasi Hills District, ha ryngkat ka jingïatreilang bad ka District Skill Committee EWKH, ha ka sngi thohdieng ka la pynlong ia ka Certification Day kaba long shi bynta ban pynkup burom ïa ki samla kiba la shah hikai ha ki sap trei kti bad kiwei ki jait jinghikai.
Ïa kane ka Prokram la pynlong ha Tirot Sing Memorial hall pyndengumiong Mairang, ha kaba la wan ban ïadonlang da u Myntri ka tnad Power and Water Resources ka sorkar jylla bah Metbah Lyngdoh kum u kongsan, ha ryngkat ka jingïadonlang ka Deputy Commissioner ka EWKHD kong Anita Kharpor, ka ADC kong V.Hynñiewta, ka Skill Development Officer EKHD kong A.Khonglam.
Haba ai jingkren u bah Metbah u la ong ba ka sorkar ka don ka jingkitkhlieh kaba khraw na ka bynta ban kyntiew ïa ki khun samla. U la ong ba ïa kane ka program la lah ban pynlong hapoh ka district, hadien ka jingïoh ïa la ka jong ka district, bad kane ka la plie ïa shibun ki lad ki lynti na ka bynta ki khun samla jong ka thaiñ.
U la pynpaw ruh ba kane ka Prokram ka long kaba donkam bha khamtam ha kane ka juk kyrduh kam. U ong ba ki don da ki phew hajar ngut ki nongwad kam, hynrei ka kam sorkar ka duna, kumta ka jinghikai ban pynroi ia ki sap treikam ka long kaba donkam bha ban lah iohjam iohjam ha kiwei kiwei pat ki bynta.
U la ong ruh ba watla don bun kiba la seng ïa ki kam lajong, kiba la lah ban ieng ha la ki jong ki kjat, hynrei dang don shibun kiwei pat ki bym pat lah ban sdang hi, kiba dang donkam ïa ka jingkyrshan hynrei lyngba kane ka prokram kan long ka jingmyntoi na ka bynta ka jong ki.
Ha kane ka sngi la ïoh ban sam ïa ki syrnod sha ki 700 tam ki samla kiba la dep ïa ka jingshah ai jinghikai. La ïoh ruh ban sam ïa ki cheque kum ka jingkyrshan na ki skhim sorkar na ki bank bad kiwei ki lad jingïarap.
