Shillong, Jymmang 13 : Ka kynhun ka BJP Meghalaya ba ialam da u Myntri Sorkar Bah Sanbor Shullai bad u MLA Bah AL Hek, ha ka sngi Balang ka la ïakynduh ïa u Myntri Khynnah ka Sorkar Pdeng uba khmih ïa ka Pule Puthi Dr Sukanta Majumdar bad dawa ban tuklar kyrkieh na ka Sorkar Pdeng ban pynbeit ïa ka kynrum kynram ka jingsynshar hapoh ka North-Eastern Hill University (NEHU).
Ka kynhun ka la batai ïa u Dr Majumdar shaphang ka jinglong jingman kaba mynta ha NEHU, haba kdew ïa ka jingbym don ki nongsynshar hapoh ka University namar ka jingbym don la slem jong u VC ha ka ophis treikam jong u.
“Ka jingduna ki nongtrei, ka jingnang hiar dor ki jingdon jingem ba donkam, ka jingbym don ka jingïalam kaba biang, ka jingnang kharoi ki jingeh, baroh kine ki la ïasnoh lang ban pynmih ïa ka rukom long kaba ktah ïa ki samla pule,” ong ka BJP.
Ka kynhun ka la kyrpad ïa ka jingtuklar kaba kyrkieh da ka Ministry jong ka Sorkar Pdeng ban pyntikna ïa ka jingtreikam kaba iaid beit iaid ryntih jong ka university kaba hakhmat eh jong ka thaiñ Shatei Lam Mihngi.
Ka la ban jur ruh “ïa ka jingdonkam ban bujli, ban thung ïa u Vice Chancellor u ba thymmai uba don ka jingsngewthuh kaba jylliew ïa ka kolshor, ka akor, bad ki jingdonkam jong ki thain.”
Kat kum ka jingong ka BJP Meghalaya, u Dr Majumdar u la ai jingkular ïa ki dkhot ba “yn sa shimkhia ban iakren mar mar ïa kane ka kam bad u Myntri Sorkar uba khmih ïa ka Pule Puthi, da kaba buh ha ka jingmut jingpyrkhat ïa ka lawei jong ki samla pule, ban pynthikna ba ka NEHU kan wanphai sha ka kyrdan treikam kaba biang ha ka por kaba kloi tam.”
.){kind=link}