Shillong, Jymmang 13 : U Myntri Rangbah ka Jylla Conrad K Sangma ha ka sngi Balang ula ong ba ka jingthaw ia ki lad kamai jakpoh ka dang dei ka jingeh kaba khraw duh jong ka Jylla haba kdew ia ka jingdon haduh 60,000 ngut ki samla kiba rung sha ka jylli treikam ha ka shisnem.
Glad to attend Skillerate 2026 at NEHU, Shillong
Today we launched four major initiatives under Skills Meghalaya- PROPEL, MEGASKILL, SHIELD, and EQUIP, aimed at strengthening livelihoods, entrepreneurship, and employment opportunities for the youth of Meghalaya.
Handed over… pic.twitter.com/oSvA2dDO5o
— Conrad K Sangma (@SangmaConrad) May 13, 2026
“Ka Meghalaya ka dei ka jylla kaba dang samla, ha kaba kumba 50% jong ki nongshong shnong ki don hapoh ka rta ba 20 snem. Man la u snem, kumba 60,000 ngut ki samla ki rung ha ka jylli wad kam wad jam. Kane ka jingdon kan nang kiew shuh shuh ha ki snem ban wan. Kumta, ka jingpynmih ïa ki lad kamai jakpoh bad ki kam kiba neh ka long, bad kan dang iai long, ka jingeh kaba kongsan tam na ka bynta jong ngi kum ka sorkar,” u la ong.
U Conrad ula kren ia kane ha ka Skillerate 2026 ba pynlong ha North Eastern Hill University, Shillong, ha kaba ula pynlait paidbah ia saw tylli ki prokram ba thmu ban pynkhlain ia ka jingpynroi iaka sap teikam ki samla bad nang pyniar ia ka lad iohkam iohjam bad sengkam sengjam jong ki samla ka Jylla.
Ha kaba pynshai ïa ka daw ha lyndet ba pynlong ia ka Jylla ban wanrah ia kane ka prokram ai jinghikai ia ki sap treikam, ula ong ba ki prokram ka ri baroh kawei, wat la ki long kiba donkam, ki donkam ban pynbeit kat kum ka jinglong ka jaka. “Ngi la lap ba ki jingdonkam jong ka jylla, katto katne ki donkam ïa ki jingïarap kiba kham bniah bad ki prokram kiba la pynwandur kyrpang. Namar kata ngi la rai ban wanrah ia la ka jong ka prokram hikai sap — kaba la kyrshan hi da ngi, kaba la shna kat kum ki jingdonkam jong ngi, bad kaba lahban pynkylla kat kum ka jingdonkam,” u la ong.
U la pynpaw ruh ïa ka bynta jong ki nongïatreilang ha ka roi ka par, da kaba ong ba kumba 50% jong ka pisa ka wan na ka project kaba ïoh jingkyrshan na bar kaba la kyrshan da ka Asian Development Bank (ADB).
Ha kaba jubab ïa ki jingsngewkhia halor kane ka jingïoh pisa, u la pynshai, “Kumba 80% jong kane ka pisa la siew biang da ka Sorkar India. Ka jingkit jong ka Jylla ka long kaba rit bha katba ki jingmyntoi ki long kiba khraw bad kiba lah ban iohi”.
Ha kaba kdew ïa ki soh jong ka prokram, u la ong ba da ki hajar ngut ki samla ki la ïoh jingmyntoi. “Namar kine ki project kiba ïoh jingkyrshan na bar, da ki hajar ngut ki samla jong ngi kila ioh ia ki jinghikai pyntbit sap. Kine ki long ki soh kiba shisha, kiba paw — kiba pynkylla ïa ki jingim, kiba pynkha ia ki lad, bad kiba plie ia ka ioh ioh kam,” u la ong.
