Shillong, Jymmang 13: Ki bor pahara ki la pynlong ia ka jingkhynra kaba jur ha ka thain Changlang jong ka Jylla Arunachal Pradesh hadien ba don ka jingiasiat markylliang hapdeng ki shipai Assam Rifles bad ki kaikhlaw NSCN ha ka thain Doimukh Nalla kaba hap hapoh jong ka Miao police station.
Arngut ki kaikhlaw kila kyllon iap ha ka jingiasiat mar kylliang.
Ia ki kyllon iap la ithuh kum u Self Style Lt. Col Umkong bad Self Style Sergeant Enu.
Ki heh ophisar ki la iathuh ba ki la ioh jingtip ba thikna ba don jong ki 14-15 ngut ki kaikhlaw ha ryngkat ki tiar ialeh kiba pyntieng bad dawa pisa na ki nongshong shnong.
Hadien ba la ioh ban pyniap ia 2 ngut ki kaikhlaw, ki bor pahara ki la pynjur ia ka jingkhynra pyrshah ia ki kaikhlaw ha katei ka thain.
Hadien ka jingkhynra kaba jur, bor pahara ki la lap kurup bun ki tiar ialeh na ka jaka ba kyllon iap 2 ngut ki kaikhlaw.
Ki tiar ialeh ba ioh kurup ki kynthup ia kawei ka suloi AK series, kawei ka suloi 5.56 mm, kawei ka pistol, u bom hand grenade, kawei ka radio set, ar tylli ki torch light, ki kuli nalor kiwei kiwei de ki tiar ialeh.
Ki pulit ki la register ruh ia ka FIR ha kaba iadei bad kane.
“Ngi pynpaw ïa ka jingkyndit bad ka jingsngewsih bad kumjuh ruh ka jingpynrem kaba jur halor ka jingjia kaba sngewsih kaba la jia ha ka thaiñ Doimuk Nala hapoh ka Miao Circle, Changlang District Arunachal Pradesh ha kaba ki shipai jong ngi na Pangsau Pass Command Group katba ki dang don haka kam ban wanrah iaka suk iaka sain ban myntoi ki nong shong shnong ha Stilwell International Highway kila shah thombor ha ki shipai pahara jong ka India na ka 8th Assam Rifles ha ka por kumba 8:30 mynmiet ha ka 11 tarik Jymmang 2026,” la ong ka NSCN.
Ka la bynrap “Ha kane ka jingjia kaba sngewsih, 3 ngut ki shipai jong ngi ki la duh noh ia la ka jong ka jingim kata u Lt. Col. Umkong, Naga Army naka shnong Nayang hapoh ka Tangshang Region bad Sgt.Enu, Naga Army naka shnong Chithok hapoh ka Leinong Region. Ka jingduh noh iaki 2 tylli ki mynsiem kadei ka jingpynkynmaw kaba sngewsih ia ka jingjynjar kaba dang iai bteng kaba la shah da ki Jaidbynriew Naga. Ngi pynpaw ia ka jingsngewlem bad jingduwai kaba sha ki longiing kiba la duh noh, da kaba ieng ha ka jingiatylli bad ki ha kane ka kynta jong ka jingsngewsih kaba jur,”.
“Ngi pynrem ia kane ka kam ka bym don jingkitkhlieh bad kaba pynkhihwin, khamtam ha ka por ba la pynpaw shai bha ia ka jingkular jong ngi ban pynneh ia ka jingsuk. Kum kine ki kam kim dei tang kiba sngewsih hynrei ki byrngem ban pynthut ia ka jingsuk. Ka jingpyndonkam mynta ka long ba ki bor ba dei khmih kidei ban kiar ban pyndonkam bakla iaka bor jong ki. Kum kine ki jingjia ym dei ban shah ban iai bteng khamtam haba ka thain bad ki nong shong shnong ki wad iaka suk ka sain” kala ong.
