Shillong Nailur 29: U Myntri ka Pule Puthi ka jylla Nagaland u Temjen Imna Along Longkumer, hynne ka sngi ula iaroh iaka nongbah Shillong bad iaka jylla Meghalaya kaba long ka shlem jong ka pule puthi ha kaba da ki hajar ngut ki samla na kylleng ki jylla ki wan ban ioh iaka jingnang jingstad ha ki kyrdan kiba heh.
“Kin don beit ki jingeh ha man la ki jylla, namar ba ka jingangnud jongki samla kila nang bun katba nang mih ki sngi, hynrei ki jingkylla haka liang ka pule puthi kala kiew bha bad katkum ka jingtip ka jong nga, u Myntri Rangbah ka jylla u Conrad K Sangma ula leh bha bad ula thaw iaka lad ka lynti ban pynlong iaka jylla Meghalaya ban long kum ka shlem jong ka pule puthi “ ong u Temjen Imna hadien ka jingwan iashimbynta haka jingialang kaba la pynlong da Akhil Bharatiya Vidyarthi Parishad (ABVP) ha nongbah Shillong.
“Dei na kata ka daw ngi phah da ki hajar ngut ki samla pule sha Shillong ba kin wan ban pule ha ki kyrdan kiba heh” ula bynrap.
Ula ai khublei ia baroh ki nong Meghalaya halor ka jinglah ban don iaka shlem jong ka pule puthi, ha kaba ka skulbah NEHU kala long kum ka nongai mynsiem ia kiwei pat ki skulbah kiba don ha kylleng ka thain shatei lam mihngi bad ki skul kiba don ha ka nongbah Shillong.
“Ha kano kano ka jingtreikam kan don beit ka jingeh hynrei da ka jingpyntreikam iaka National Education Policy ha kaba u Myntri Rangbahduh ka ri ula pynwandur iaka plan da ka jingiohi jngai lypa na ka bynta ban kyntiew iaka pule puthi bad ban pynneh pynsah pat iaka jinglong kawei kum ki nong India bad ban pynthikna baka pule puthi kan dei kata ka lad kaba ki samla kin lah ban pynurlong iala ka jingangnud ha kano kano ka lain” ong une u Myntri.
