Shillong, Nailur 29 : Ka Hynniewtrep Youth Council (HYC) Central Body ryngkat bad ki nongshong shnong jong ka Baikam hynne ka sngi ki la leit ban kynduh ia u Myntri Kampohing ka jylla Bah Lahkmen Rymbui bad kyrpad ia u ban kynthup lang noh ia ka shnong jong ki ha u pud u sam jong ka Meghalaya.
U Secretary ka Baikam Ma Rimon Suchiang u la iathuh ba ki don 34 tylli ki longiing kiba don ha Baikam kiba la wan ban shong shnong ha ki snem 1977 bad kane ka shnong ka dei kaba ha East Jaintia Hills ha ki thain Malidor jong ka Meghalaya bad Cachar District jong ka Assam.
U la pyntip ruh ba baroh ki nongshong shnong ki dei ki paid Khasi Pnar bad baroh ki don 205 ngut ki nongshong shnong ha kaba bun ki dei ki nongrep bad ki nongbylla sngi ha kaba ka kam ka jam jong ki kakut beit ha la ka shnong la jong.
“Namarba ka sorkar Meghalaya bad Assam ka la rai ban pynbeit noh ia u pud u sam hapdeng kitie ki jylla ngi ki nongshong shnong ka Baikam ngi kyrpad iaka sorkar jylla ba kan kynthup lang noh ia ka shnong Baikam hapoh ka jylla Meghalaya namarba ngi dang jan bha bad ka shnong Ratacherra bad Border Umperdit ha ka phang sepngi bad don ruh ha ka phang kamon jong ka wah Malidor kaba ju tip kum ka wah Baleshwar ha Assam,” ong u Suchiang.
Shuh shuh u la kam ruh ba ki nongshong shnong ka Baikam ki tip satia shaphang ka jingthaw ia kitei ki Regional Comittee na ka bynta ka Ratacherra bda kumta kam shymla don kano kano ka jingkhih na ka liang ka shnong ban kynduh ia ki nongialam.
La ong ruh ba namar ka sorkar jylla dang mut ban leh ia ka sorbe ban phiah ia u pud u sam hapdeng ka Meghalaya bad Assam kumta ka dang biang ka por ia ki ban khih bad dawa ban kynthup lang ia ka shnong jong ki ha u pud u sam jong ka Meghalaya halor ka nongrim ba ki dang dei na kajuh ka jaitbynriew, kajuh ka ktien ka thylliej bad ruh ki dei ki riewlum kiba dei na ka jaidbynriew Khasi – Panar.
