Mynjur ka Sorkar ia ka VDA ki muster roll | T.10 klur yn hap pynlut shisnem : CM

Shillong, Jymmang 01: Ha ka sngi kynmaw burom iaki nongbylla, (May Day), u Myntri Rangbah ka jylla Conrad K Sangma u la ong ba ka Sorkar ka la mynjur ia ka jingdawa jong ki nongtrei muster roll haba iadei bad ka Variable Dearness Allowance (VDA), kaba wanrah ia ka jingpynlut kaba T.10 klur haka shisnem.

Haba kren ha ka prokram International Workers’ Day ba la pynlong da ka Ophis Labour Commissioner bad ka Meghalaya Building & Other Construction Workers Welfare Board, u Conrad u la ong ba ïa kane ka jingdawa ki nongtrei Muster Roll la pynurlong haka 30 tarik Iaiong daka ba buh hakhmat ïa ka jingkordor jong ka 1 tarik Jymmang.

“Nga sngewkmen ban pyntip sha phi ba haka 30 tarik Iaiong ka Sorkar da kaba buh hakhmat iaka jingkyrpang jongka 1 tarik Jymmang, ngi la mynjur iaka File bad ia ka VDA kaba thymmai na ka bynta ki nongtrei muster roll khnang ba ki nongtrei muster roll jong ngi kin ioh ia ki jingmyntoi kiba donkam bad kiba ki dei hok ba kin ioh” la ong Myntri Rangbah.

Haba pynpaw iaka jingktah ia ka pla tyngka, u Conrad u la ong ba ia kane ka rai la shim daka pyrkhat iaka bha ka miat jong ka imlang sahlang.

“Kane kan pynlut shuh iaka pla tyngka jong ka Sorkar kaba kot T.10 klur man u snem, hynrei ngi ngeit ba ia kane ka pisa kaba ngin pynlut kan long na ka bynta ka jingmyntoi jong ka bynta kaba kham heh jong ka imlang sahlang khamtam kito kiba duna haka ioh ka kot” ula ong.

“Kumta ka dei kaei kaei baka Sorkar kaba buh hakhmat iaka bha ka miat jong ka imlang sahlang ka dei kaei kaei kaba ngi dei ban leh” u la bynrap.

U Myntri Rangbah u la kdew ba ka jingai jingmynjur iaka VDA kan ai jingmyntoi iaki nongtrei Muster Roll.

“Namarkata, ngi la shim ïa kane ka rai kaba kongsan bad nga sngewkmen ba kane kan ai jingmyntoi ïa ki hajar ngut ki muster roll bad ki nongtrei bapher bapher kiba trei ha ki tnat treikam bapher bapher” ula ong.

Ka VDA, kaba don jingiadei bad ka jingkiew dor ki mar mara, ka la long ka jingdawa ba kongsan jong ki nongtrei muster roll ha Meghalaya kiba trei ha ki tnat bapher bapher katkum ka jingsiew ba ki ioh man ka sngi.