Shillong, Nailur 28: U Symbud Myntri Rangbah ka jylla Bah Prestone Tynsong hynne ka sngi Balang, ula pynshai ba ka jinghiar jong ka jingiohlum khajna ka tnad Mining & Geology ka jylla kadei namar ba ka jingkhaii ia u dewiong ka dei tang ia kaba la pynbna bad ithuh da ka Supreme Court.
“Ki hukum kiba mih la ka dei ka National Green Tribunal, ka High Court ne Supreme Court, ki dei ki daw ka jinghiar ha ka jingpynmih iaka khajna khamtam ba ka jingkhaii ia u dewiong mynta ka long beit thik tang ia u dewiong uba la dep ban pynbna bad ithuh daka Supreme Court bad wat iaka jing lilam ia u dewiong ruh ym shim la leh daka sorkar jylla hynrei la leh daka Coal India Limited” ong u Bah Prestone Tynsong.
U Bah Prestone u la ong, mynta ha kaba iadei bad ka kam tih dewiong donkam ban bud ryntih iaka jingbthah jongka Supreme Court bad ban bud ryntih ia ki kyndon jongka MMDR Act bad mynta bun ngut kila aplai ban ioh iaka Mining Lease bad ki kam ki jam kila sdang ban iaid shakhmat.
“Nga don iaka jingkyrmen ba shen yn sa lah ban ai noh iaka Mining Lease sha kito kiba aplai hynrei ka dei pat ban long ne iaid katkum ki kyndon aiñ” ong u Symbud Myntri Rangbah.
U la ong, haduh mynta ym pat lah ban tip ki don katno ngut kiba pan iaka Mining Lease namar ba mano mano ruh ki lah ban aplai tangba kidei pat ban pyndep ia ki kyndon kiba la buh bad ban pynbiang ruh ia ki kot ki sla katkum ki kyndon jongka MMDR Act.
Ha kaba iadei bad ka jingbym lah ka sorkar jylla ban pyndep ia kiba bun tylli ki projek, u Bah Prestone u la pynshai da kaba ong “Ha kine ki ar snem kiba la dep kata ha u snem 2020 bad 2021 ym shim la lah ban pyniaid shakhmat ia ki kam ki jam namar ka jingsaphriang ka khlam COVID, hynrei kiba bun ki kam ki jam kila iaid shakhmat ha u bnai Rymphang bad Lber mynta u snem”.
U la ong, ka sorkar ka thrang ba dei ban pyndep ia ki projek kiba dang sahteng bad ka don iaka jing kitkhlieh ban pyndep noh kham kloi.
“Lada ngi lah ban pyndep iaka jingtei iaka Crowborough Hotel kaba la sahteng la palat 37 snem, kam don jingeh ia ngi ban lah ruh ha ka ban pyndep ia kiwei ki projek” pynkut u Bah Prestone.
