Shillong Iaiong 19: Ka jingiakhih ban pyrshah ia ka projek kam jngohkai ha Dewlynnong Lumpongdeng kala jam sha ka sngi kaba 11, ha kaba u Secretary General ka Green Tech Foundation Ritre Lyngdoh, uba la iasnohkti lang bad u Chairman ha ka jingshah thngan, hynne ka sngi u Blei ula ong, ba ka koit ka khiah jong u ka dang biang watla ula pyndep ia ka jingshah thngan kaba 48 kynta.
“Ki Doctor kila khmih ia ka jinglong ka koit ka khiah jong nga naduh ka por mynstep bad ha ka por janmiet ruh. Ka jinglong jingman ka jong nga baroh ka long kaba biang lut, watla kala don pat ka jingtyrkhong um ka met kaba malu mala,” ula ong.
U Ritre Lyngdoh ula ai burom ia ka jinglong jingman ka jong u sha ka jingai jingkyrshan jong ki paitbah. “Ngam da sngew tlot than watla ka jingshah thngan ka jong nga kan sa kynjoh sha ka 48 kynta. Kane kadei namar ka jingbuh jingduwai jong kito kiba kyrshan ia ngi ha madan bad kumjuh ruh ia kito kiba kitbok kitrwiang” ula bynrap.
Ula pynpaw ba ka jingai jingmut ki nongai jingsumar kala iapher na kaei kaba u sngew nalade shimet, “Ki doctor kila ong ba ka koit ka khiah jong nga kala nang tlot hynrei nga sngew ba nga dang biang”.
Ka Green Tech Foundation kala iai dawa ban pynduh pyndam noh ia ka projek kam jngohkai bad ka jingiatehkular aiwai jaka na ka bynta ka projek ha dewlynnong Lumpongdeng.
U Chairman jong ka GTF ula iai bteng ban shah thngan hapoh Shillong civil hospital.
