Nongstoin, Iaiong 19 : Uwei u Tynmen ba palat 50 snem ka rta, la kynnoh ba ula leh kynshlein bad jrong kti ia kawei ka heprit (bala buhrieh kyrteng) ha kawei ka shnong ha West Khasi Hills, kaba hap hapoh ka Nongstoin Police Station.
Kat kum ka jingiathuh ki Kmie Kpa (bala buhrieh kyrteng), kane ka jingjia kala jia naduh ka 9 tarik Rymphang 2026, ha ka por kumba 3 baje eiei bad la kynnoh ba une u tynmen u dei u kynja Kparad jong kane ka heprit, uba la khot ia ka sha Iing jong u, kaba don marjan ka iingsah.
Ki iathuh ba ha kane ka sngi, ym shym la don briew satia ha Iing namar baroh shikmie shikpa ki dang leit iew sha Umdohlun.
Ki iathuh ba une u Tynmen ula pynbiej ia kane ka heprit da kaba pyni phlim ha ka mobilephone bad katba ka dang peit phlim, ula tare ia ka met bad phad kumjuh ruh sha ki jaka bym dei.
Ki Kmie Kpa ki iathuh ba kane ka khun jong ki,kala khynniuh baroh shirynieng bad kala kyrpad ba un pynlait ba ka kwah ban leit shabar bad dei haba ula pynlait ia kan, kala phet bad mareh beit beit sha Iing.
Halor kane ka jingjia, ka Kmie mar mar kala leit ialam noh sha ki doktor ban phah peit bniah. “ Ki doktor kila khmih bha ia kane ka khynnah bad kila ai da ka jingthoh sha ka Kmie, ia kaba na ka liang jong nga bad ka Kmie, ngim ithuh satia iakaei kaba la thoh”.
Ki iathuh ba hadien kane, kila pyntip sha ki Kni ba kin pynbeit ia kaei kaba dei ban leh hynrei kane ka jingshaniah ha ki kni ka khlem poi shano sahno ruh. Ki ong ba dei tad hadien ba ka khubor kala poi sah ka Meiduh kane ka Heprit kaba don ha Mawkyrwat, mar mar kila leit ban ujor da ka ejahar ha ka 24 tarik Rymphang 2026.
Ki iathuh ba ki Pulit kila register case halor kane ka ejahar hynrei kila pynpaw ia ka jinglyngngoh ba ki Pulit kat haduh mynta kim pat shym la kem satia ia une u tynmen bad pynngat ha ki kyndon ain khamtam ka POCSO.
Ki iathuh ba naduh katei ka sngi ba jia kane ka jingjia, kane ka heprit kam shym la nud shuh ban leit Skul bad wat ban mih ialehkai shabar Iing.
Kine baroh arngut kila kyrpad ia ki bor ka ain ba kin shimkhia ia ka jingujor bad ban leh eiei noh pyrshah ia utei u tynmen kat kum ki kyndon ain.
 ha kawei ka shnong ha West Khasi Hills, kaba hap hapoh ka Nongstoin Police Station.){kind=link}