Shillong, Iaiong 16 : U Nongaiktien ka BJP Bah Mariahom Kharkrang ha ka sngi Palei, ula ong ba ki kynrum kynram halor ka tourism project ha dewlynnong Lumpongdeng ka iaid palat tang ia ka jingsngewkhia halor ka mariang bad kyntu ia ka Sorkar ba kan bishar bniah ia ka jingktah ia ka mariang, ban pynneh pynsah ia ki jaka Sorkar bad pynthikna ba ki trai shnong ki ioh jingmyntoi n aka roi ka par.
“Ka kynrum kynram ba dang shen halor ka dewlynnong Lumpongdeng kala pynmih ia katto katne ki jingsngew kiba iaid palat tang ia ka jingsngewkhia halor ka mariang” ong u Bah Kharkrang ha ka kyrwoh.
“Haba phai sha ka sawdong sawkun ka mariang, ka Pung Umiam kam dei tang ba itynnad bha – ka dei kaba la long tynrai ha ka jinglong ka mariang bad ka kolshor ka Meghalaya. Bad ka dewlynnong Lumpongdeng ka dei kaba la khein kum ka jaka ba shongdor bha bad kaba don jingma na ki jingshah pynjulor”.
Haba pynpaw ba ka jingpynroi ia ki kam jngohkai ka long kaba donkam bha mynta, ula maham pat “Ka Sorkar ka dei ban da pyrkhat bha ia ka jingshah ktah ka mariang hashuwa ban ai jingmynjur ia kano kano ka project. Ka jingpynjulor ia ka mariang kan sa ktah jur bha ia ka Meghalaya bad ia ki nongshongshnong”.
U Bah Kharkrang ula pynsngew ruh ia ka jingnang duna ki jaka Sorkar namar ka jingpyntreikam ia ki project kam jngohkai bapher bapher.
“Ki don bun tylli ki project tourism ba thmu ban pyntrei bad baroh kine kin ieng ha ki jaka Sorkar kaba mut ba ki jaka Sorkar kila nang duna ha ka Jylla kaba dei ka mat ba sngewkhia” ula ong.
“Ha Meghalaya ki don bun ki jaka ba itynnad kiba long trai da ki riew shimet. Ngi kyntu ia ka Sorkar ban pyrkhat ha kaban iatehlok bad kine ki trai jaka na ka bynta ban pyntrei ia ki project kam jngohkai kiba heh” ula bynrap.
“Ka jingpyniadon bynta lang ia ki riew shimet ym tang ba kan iada ia ki jaka Sorkar na ka jingjah noh, hynrei kan ai kamai pisa bad kiwei ki jingmyntoi ia ki nongshongshnong shimet ka Jylla. Ia ki jaka Sorkar dei ban buh na ka bynta kiwei ki project kam pynroi, kum ki karkhana pynmih bording haba ai nuksa”.
Halor ka aikam aijam, u nongaiktien ka BJP ula ban jur ia ka jingdonkam ban khot ia ki trai shnong.
“Ka jingwan ki construction company nabar ka Jylla ka dei kaba ngi pdiang sngewbha; ngi ioh jinghikai na ki jingshemphang jong ki. Hynrei katto katne percent ki nongtrei bad kiwei ki nongbylla ki dei ban long da ki trai shnong, bad ki trai muluk ka Jylla” ula ong.
“Kaei ka jingmut ka roi ka par bad ki project kiba heh lada ki trai shnong kim ioh jingmyntoi ha ka ioh ka kot bad ka jingpynroi ia ka sap treikam” buh jingkylli u Bah Kharkrang haba kyntu ia ka Sorkar ba kan pynduna ia ka bai register ia ki nongsengkam lajong kiba dei ki trai shnong.
“Ki don ki trai shnong kiba kwah ban pyndonkam ia ki jaka jong ki ban tei ia ki project ne leh business. Kaba sngewsih ka long ba ki hap ban siew ia ka bai register kaba heh haduh ba ki jingthmu jong ki, kila kylla long ki jingphohsniew bym lah ban pynurlong” ula ong.
