Shillong, Iaiong 15: Ka President ka BJP Mahila Morcha Kong Arena Hynniewta ha ka sngi Balang, kala ai jingiaroh ia ka jingshim rai ka Sorkar Pdeng ban bhah 33% ia ki longkmie ha ka kam synshar bad kala ong, ba kane kadei ka sienjam ka ban sah kynmaw ha ka histori, kaban wanrah ia ka jingkylla ha ka imlang sahlang.
Haba kren hadien ba la wai ka jingialang paitbah kaba la pynlong ha Nongpoh da ki samla kynthei bad ki longkmie ka Ri-Bhoi district, ka Kong Hynniewta kala ong, ba la pynlong ia kane ka jingialang ka long ban phah ia ka kyrwoh sha man la ki shnong ki thaw bad ki district ha kylleng jong ka Meghalaya.
“Ka jingthmu kadei ban pynlong ia ki longkmie ba kin tip shaphang ka burom bad ka jingioh jingithuh kaba kila ioh bad kumno kane kan wanrah ia ka jingkylla kabab ha ha ka jingiaid shaphrang bad ka roi ka par jong ka imlang sahlang.
Ha kaba iadei bad ka Nari Shakti Vandan Adhiniyam, ka Kong Hynniewta kala pynpaw ba kane kane ka kyndon ka plie lad ban don ia ka jingkitkhlieh kaba iar ia ki longkmie ha ki kam kiba iadei bad ka jingthaw ia ki aiñ ki kanun.
“Ka jingbhah kyrpang 33% ia ki longkmie ha ka kam synshar kadei ka sienjam ha ka histori kaban plie lad ia ki longkmie ban iadobynta lang ha ka kam thaw ain bad ban mihkhmat ha ki rynsan ki bapher bapher kum ki Member of Parliament (MP), Members of Legislative Assembly (MLA) bad Members of District Council (MDC),” kala ong.
“Kane ka sienjam kan pynshlur ia ki kynthei ba kin ia treilang, ban pynkhlain ia ka jingiatylli bad ban wanrah ia ka jingkylla kaba don jingmut”.
Nalor kane, kala banjur ba ka jingiashimbynta ki longkmie ha kaban long nongialam kan iarap ban shimkhia ia ki mat kiba ki mad jingeh da ki samla.
“Ka jingiashimbynta ki kynthei ha kaban long nongialam kan iarap ruh ha kaban shimkhia ia ki jingeh kiba mad da ki samla, khamtam ha ka pule puthi, iohkam iohjam bad ki lad ki kabu. Haba ki longkmie kila shah pynkup bor kin lah ban ai ka jingiada bad ban btin lynti ia ki khynnah kiban sa long ka kawei” ong ka Kong
Hynniewta.
Ka President ka BJP Mahila Morcha kala ong, “Nga phah ia ka jingsngewnguh ia ka Sorkar Pdeng kaba mynta kaba la iengskhem ha ka jingkular bad ban wanrah ia kane ka ain kaba kongsan na ka bynta ki longkmie. Ki longkmie kin ym kut shuh tang ha ki kamram tynrai jongki, hynrei mynta la pynkup bor ia ki ba kin ieng ban iada ia ka hok bad ban shakri kum ki nongshong shnong kiba don ia ka jingkitkhlieh ia ka ri”.
Ka Kong Hynniewta kala ai khublei ruh ia u Myntri Rangbahduh ka ri u Narendra Modi halor ka jingialam ka jongu ha kaba iadei bad kane ka mat.
“Nga ai khublei kyrpang ia u Myntri Rangbahduh ka ri u Narendra Modi halor ka jingiohi jngai bad ban sngewthuh ia ka jingkitkhlieh bad ka jingangnud jong ki longkmie” ka la bynrap.
